Jarðskjálftamælir á Grímsfjalli hefur sýnt aukinn hátíðnióróa frá miðnætti í dag. Er hann talinn tengjast suðu í jarðhitakerfinu í Grímsvötnum sem gjarnan kemur fram í lok jökulhlaupa. 

Þetta kemur fram í tilkynningu frá Veðurstofu Íslands. 

Þar segir að vatnshæð í Gígjukvísl hefur verið nokkuð stöðug frá því í nótt sem bendir til þess að rennsli í ánni sé í hámarki. Búast má við að rennsli fari hægt minnkandi næstu daga þar til hlaupinu lýkur.

Sambærilegur hátíðniórói hefur mælst í síðustu Grímsvatnahlaupum sem ekki hafa hleypt af stað eldgosi. Ef til eldgoss kæmi í Grímsvötnum er gert ráð fyrir því að ákafrar aukningar í smáskjálftavirkni yrði vart áður en gos hæfist.

Lítil jarðskjálftavirkni hefur verið í Grímsvötnum í dag og um helgina, en frá því á föstudag hafa átta jarðskjálftar mælst þar, allir undir tveimur að stærð.

Tengdar fréttir

Grímsvötn

„Ekki til að hafa stórar áhyggjur af“

• Fylgjast vel með: Fleiri skjálftar en fyrir gos 2011
• Nýjar gervihnattamyndir sýna tvo sigkatla
• Rafleiðni og órói á niðurleið
• 2,7 stiga skjálfti í Bárðarbungu

» Fleiri tengdar fréttir

• Blogga um frétt