Vorkennir þeim á móti sem misstu allt
Setja bókamerki
Hrannar Jón Emilsson segist reyna að halda áfram með lífið án þess að hugsa of mikið um hvað gerist í húsnæðismálunum eftir að húsið hans lenti undir hrauni í Grindavík í gær.
Framkvæmdum á húsinu, að Efrahópi 19, var að ljúka þegar eldgosið varð. Ætlaði fjölskyldan að flytja bráðlega inn.
Búa í Garðabænum
„Ég ákvað að halda áfram með lífið í augnablikinu og hitt verður eitthvað sem verður að vinnast úr á næstu dögum og mánuðum jafnvel,” segir Hrannar Jón um næstu skref í húsnæðismálum.
Sex manna fjölskyldan hans er búsett í leiguíbúð í Garðabæ og hefur það ágætt þar, miðað við aðstæður. Áður dvaldi hún í leiguhúsnæði að Víkurbraut 30 í Grindavík, sem núna hefur verið dæmt ónýtt eftir jarðhræringarnar í bænum.
Hjartað leitar heim
Hrannar Jón kveðst vera hálf skelkaður yfir því hvernig fór, degi eftir hamfarirnar, en heilsa hans og fjölskyldunnar sé sem betur fer góð og það sé fyrir öllu. „Ég er kannski meira á því stigi að vorkenna þeim fjölskyldum úr húsunum á móti sem misstu allt. Þau fóru mikið verr út úr þessu en ég,” segir hann og á þar við að búslóð þeirra hafi verið í húsunum.
Spurður nánar út í óvissuna sem ríkir í húsnæðismálum hans og annarra Grindvíkinga kveðst hann vera mikill Grindvíkingur og hjartað leiti alltaf heim. „Eins og staðan er í dag þá verður maður að meta hvað er best fyrir fjölskylduna. Við erum bæði fædd og uppaldir Grindvíkingar þannig að hjartað var mjög sterkt í að fara heim. Ég var að starta öllum iðnaðarmönnum í síðustu viku til að klára þetta fyrir vor þannig að maður kæmist heim,” segir hann.
„Þangað til í gærmorgun var ég bara á leiðinni heim.“
Áfram óvissustig vegna skriðuhættu
Nota ekki jólaljós til að níðast á fólki
Hjúkrunarfræðingar skrifa undir kjarasamning
Við urðum að byrja upp á nýtt
Telur njósnirnar vega að lýðræðinu á Íslandi
Klúr skrif beindust einnig gegn börnum
Spá illviðri víða um land á morgun