Innlent | mbl | 16.1.2024 | 11:11 | Uppfært 12:01

Óska eftir lyklum til að kanna ástand hitakerfa

Eins og staðan er núna þá er vera íbúa óheimil í Grindavík en viðbragðsaðilar hafa verið þar að störfum. mbl.is/Hörður Kristleifsson

Íbúar á skilgreindum svæðum í Grindavík eru hvattir til að afhenda lykla að íbúðum sínum eins fljótt og auðið er svo unnt sé að kanna ástand hitakerfa fasteignanna.

Á þetta við um íbúa sem skilgreind eru sem rauða og græna hverfið og hluta af bláa hverfinu á rýmingarkorti Grindavíkur. Einnig má sjá götulista hér fyrir neðan.

Til þess að hægt sé að kanna ástand hitakerfa fasteigna er þess nú óskað að íbúar Grindavíkur í hverfunum sem skilgreind eru í rauða og græna hverfinu komi með lykla að íbúðum sínum. Kort/Almannavarnir

Eru íbúarnir beðnir um að skila lyklunum annað hvort í þjónustumiðstöð almannavarna í Tollhúsinu við Tryggvagötu eða í húsnæði Brunavarna Suðurnesja að Flugvöllum 33 í Reykjanesbæ. Verður móttaka lykla á þessum tveimur stöðum til klukkan 17 í dag.

Þeir sem ekki ná að koma lyklunum fyrir þann tíma á þessa staði geta einnig komið með þá á íbúafund Grindavíkurbæjar sem er haldinn klukkan 17 í Laugardalshöll.

Frá þessu er greint í tilkynningu almannavarna.

Frétt af mbl.is

Heitt vatn komið í vesturhluta Grindavíkur

Ofangreint drónamyndskeið tók Hörður Kristleifsson fyrir mbl.is í gær mánudag.

mbl.is/Kristinn Magnússon

Brýnt að ráðast í þessar aðgerðir

Almannavarnir, í samstarfi við HS Veitur, hófu í gærkvöldi að koma heituvatni á hús vestan Víkurbrautar í Grindavík.

„Mikil áhersla var lögð á þessa framkvæmd þar sem talsvert frost er á svæðinu og verður næstu daga. Því var nauðsynlegt var að fara í þessa aðgerð til að koma í veg fyrir mikið eða meira tjón á húsum,“ segir í tilkynningu almannavarna.

Til að hægt sé að kanna ástand hitakerfanna í fasteignunum er óskað þess að íbúar í eftirfarandi götum komi með lykla:

•Skipastígur

•Árnastígur

•Vigdísarvellir

•Glæsivellir

•Ásvellir

•Gerðavellir

•Baðsvellir

•Selsvellir

•Litluvellir

•Sólvellir

•Hólavellir