Mótmæla harðlega vinnubrögðum Landsvirkjunar
Setja bókamerki
Sveitarstjórn Skeiða- og Gnúpverjahrepps mótmælir harðlega vinnubrögðum Landsvirkjunar vegna fyrirhugaðs útboðs á vindmyllum fyrir Búrfellslund.
Bendir sveitarstjórnin á að stjórnvöldum sé ekki heimilt að veita leyfi tengt Búrfellslundi samkvæmt lögum um verndar- og orkunýtingaráætlun.
Telur sveitarstjórnin ámælisvert að Landsvirkjun „skuli reyna að fara í kringum lög og vinna gegn hagsmunum nærsamfélagsins. Slík vinnubrögð eru ekki til þess að skapa sátt um komandi orkuöflun sem nauðsynlegt er að ráðast í“.
Þetta kemur fram í tilkynningu sveitarstjórnarinnar.
Fóru fram á frestun
Landsvirkjun auglýsti í gær fyrirhugað útboð á vindmyllum fyrir Búrfellslund en hann var samþykktur í nýtingarflokki af Alþingi í júní 2022 og hannaður í mismunandi útfærslum í Skeiða- og Gnúpverjahreppi og Rangárþingi Ytra.
„Í umhverfismatinu sem liggur til grundvallar afgreiðslu Rammaáætlunar og Alþingis er gert ráð fyrir að nýta núverandi raforkuinnviði svæðisins sem að megninu til eru í Skeiða- og Gnúpverjahreppi. Virkjanakosturinn Búrfellslundur sem samþykktur var í nýtingarflokk samkvæmt lögum um verndar- og orkunýtingaráætlun 48/2011 er því háður samþykki bæði Skeiða- og Gnúpverjahrepps og Rangárþings Ytra,“ segir í tilkynningunni.
Í júní fór sveitarstjórn Skeiða- og Gnúpverjahrepps fram á frestun á virkjanakostinum, líkt og heimild er fyrir í 7. gr. laga verndar- og orkunýtingaráætlunar.
„Skýrt kemur fram í lögunum að sé farið fram á frestunina skuli fara með virkjanakostinn eins og hann sé í biðflokki og því er stjórnvöldum ekki heimilt að veita leyfi tengt virkjanakostinum,“ segir í tilkynningunni.
Áhyggjur af ferðaþjónustu
Telur sveitarstjórnin að Búrfellslundur geti takmarkað möguleika sveitarfélagsins til uppbyggingar í ferðaþjónustu og útivist á svæðinu þar sem vindmyllurnar verði gríðarlegt inngrip í hálendi Íslands sem sjónrænt áhrifasvæði. Geti bygging Búrfellslundar því unnið gegn hagsmunum nærsamfélagsins og valdið óbætanlegu tjóni til framtíðar.
„Ljóst er að ekkert sveitarfélag getur samþykkt að slík uppbyggingaráform verði keyrð áfram gegn vilja sveitarfélags. Fyrirhugaður Búrfellslundur er innan miðhálendislínunnar. Aðeins rúmir 2 km eru frá skilgreindu svæði Búrfellslundar að Þjóðlendunni í Þjórsárdal þar sem er að finna stærstu friðlýsingu minja á Íslandi.“
Hálendi Íslands „mun verðmætara“
Er því haldið fram að Búrfellslundur muni valda margfalt meira tjóni fyrir íslenskt samfélag heldur en sú orka sem hann á að skapa til skamms tíma.
„Búrfellslundur mun framleiða 440GWst á ári og miðað við meðalverð Landsvirkjunar á rafmagni þýðir það 2,5 milljarðar í tekjur á ári. Til að setja hlutina í samhengi þá voru tekjur ferðaþjónustu á Íslandi árið 2022 1,7 milljarður á dag eða 635 milljarðar á ári samkvæmt upplýsingum frá viðskiptaráðuneytinu.
Hálendi Íslands er mun verðmætara fyrir þjóðina óraskað í ferðaþjónustu og útivist heldur en að raska því með vindmyllum sem hægt er að staðsetja um land allt. Þess má geta að mun meiri orka fengist með því að laga flutningskerfi raforku og nýta ónýtt afl í núverandi virkjunum Landsvirkjunar.“
Virkt eldfjallasvæði
Þá er bent á að í ljósi náttúruhamfara á Reykjanesskaga sé glapræði að byggja vindorkuver sem er óháð staðsetningu á virku eldfjallasvæði og á sama stað og flestar vatnsaflsvirkjanir landsins. Frekar eigi að dreifa áhættunni og staðsetja vindorkuver á öðrum svæðum.
„Áhættan af því að byggja Búrfellslund er einfaldlega of mikil með þjóðaröryggi landsins í húfi.“
Átti ekki að láta pirring bitna á sjúklingi
Gosið gæti varað lengur: Meiri fyrirstaða í gosrásinni
Tekist á um áður óþekkta skýrslu landlæknis
Mæðgur dæmdar til að greiða 64 milljónir
Hraun fór yfir Grindavíkurveg
Borgin verður af milljörðum eftir dóm Hæstaréttar
Erlendir miðlar greina frá tíunda gosinu