Aflétta óvissustigi vegna snjóflóðahættu

Engar tilkynningar hafa borist Veðurstofu Íslands um snjóflóð í nótt. Óvissustigi vegna snjóflóðahættu í Mýrdal hefur verið aflétt.

Þetta staðfestir Heiður Þórisdóttir, sérfræðingur á snjóflóða- og skriðuvakt Veðurstofu Íslands, í samtali við mbl.is.

Frétt af mbl.is

Snjóflóðahætta í Mýrdal

„Það er búið að hlýna. Það er búið að draga úr vindi þannig snjórinn hefur aðeins sjatnað. Það hefur alveg dregið úr snjóflóðahættu,“ segir Heiður, sem bendir þó á að þar sem að enn er myrkur á það eftir að koma betur í ljós hvort, og þá hvar, snjóflóð féllu í nótt.

Hún bendir þá einnig á að enn sé víða ófært. Ef fólk á svæðinu tekur eftir því að snjóflóð hefur fallið er því bent á að hafa samband við Veðurstofu Íslands.

Nýr snjór gæti sett af stað flóð 

Í tilkynningu ofanflóðavaktar Veðurstofunnar segir: „Í nótt snjóaði mikið og skóf í austanátt í Mýrdal en snjókoman er nú gengin yfir. Það dró úr vindi þegar leið á nóttina og hlýnaði. Nú er létt rigning og snjór hefur sjatnað talsvert. Talið er að verulega hafi dregið úr snjóflóðahættu í Mýrdalnum og að hætta í dreifbýli sé yfirstaðin. Óvissustigi og viðbúnaði vegna snjóflóðahættu er því aflétt.“

Þá segir að í dag sé spáð hæglætis veðri, lítilli úrkomu, hægri vestanátt og hita í kringum frostmark.

„Fólk á ferð til fjalla ætti þó að fara varlega fyrst um sinn þar sem auknar líkur eru á að fólk geti sett af stað snjóflóð í öllum þessum nýja snjó.“

Frétt af mbl.is

Hiti í kringum frostmark

• Blogga um frétt