Reykjanesbraut lokuð í báðar áttir

Reykjanesbraut er lokuð í báðar áttir. Þetta kemur fram í tilkynningu frá lögreglunni á Suðurnesjum.

Mjög slæmt skyggni er á Reykjanesbraut og slæm færð samkvæmt upplýsingum frá lögreglu.

„Vegfarendur á svæðinu eru beðnir um að sýna aðgát. Snjóþekja, hálka eða hálkublettir eru á flestum leiðum,“ segir í tilkynningu lögreglu.

Vegfarandi um Reykjanesbrautina gegnum Hafnarfjörð og Kópavog sem mbl.is ræddi við sagði að staðan í umferðinni væri „bara galin“. Það sjáist ekki á milli bíla, umferðin sé á um tíu kílómetra hraða og bílar séu stopp hingað og þangað.

Guðbrandur Sigurðsson, aðstoðaryfirlögregluþjónn í umferðardeild lögreglu, segir í samtali við mbl.is að sem betur fer hafi meginþungi umferðar verið kominn til vinnu þegar skyggni tók að versna um níuleytið í morgun.

Fram að því segir hann að umferðin hafi gengið bærilega. Segir hann að engin umferðartengd atvik hafi verið tilkynnt lögreglu enn sem komið er.

Frétt af mbl.is

„Bíða okkar 30 árekstrar um alla borg“

Árekstur.is haft í nægu að snúast

Aðstæður á götunum eru alls ekki góðar en auk slæms skyggnis er fljúgandi hálka víða og töluvert hefur verið um óhöpp í umferðinni.

mbl.is sló á þráðinn til Kristjáns Kristjánssonar, framkvæmdastjóra áreksturs.is. Kristján hafði í nægu að snúast, var á vettvangi áreksturs, með fólk í bílnum og hafði engin tök á ræða við blaðamann.

Ástæða er til að brýna fyrir fólki að fara varlega í umferðinni svo það komist áfallalaust inn í helgina. 

Fréttin hefur verið uppfærð.

• Blogga um frétt