Kári Freyr Kristinsson
Víðir Reynisson, sviðstjóri almannavarna, segir að verið sé að vakta hrinu jarðskjálfta í Húsfellsbruna.
Lítil hrina hófst þar á föstudag og hafa jarðskjálftar mælst reglulega síðan.
„Það er verið að vakta allt landið. Það hefur ekkert minnkað þrátt fyrir atburðarásina sem er í gangi í Grindavík,“ segir hann í samtali við mbl.is að loknum upplýsingafundi almannavarna.
Húsfellsbruni er hraun sem þekur stórt svæði, á milli Heiðmerkur og Bláfjalla, og er það hraun sem næst komst Reykjavík í síðustu goshrinu á Reykjanesskaga.
Víðir segir þetta áskorun fyrir Veðurstofuna og vísindamenn.
„Þau eru að vakta allt landið þrátt fyrir þetta,“ segir hann og vísar til ástandsins í og við Grindavík.