Þorvaldur Þórðarson, prófessor í eldfjallafræði við Háskóla Íslands, segir að jökulhlaupið sem varð úr Grímsvötnum í síðasta mánuði hafi ekki verið sá þrýstiléttir sem menn töldu að gæti verið nægur til að koma af stað eldgosi.

„Miðað við hvernig staðan er á landrisinu í Grímsvötnum og hversu langur tími er liðin frá síðasta gosi þar þá má búast við gosi í Grímsvötnum á næstunni en það getur líka dregist um nokkur ár,“ segir Þorvaldur við mbl.is, en jökulhlaupið í janúar var lítið.

Frétt af mbl.is

Grímsvötn eru komin að þolmörkum, segir Þorvaldur

Grímsvötn gjósa að meðaltali einu sinni til tvisvar á hverjum áratug en seinast gaus þar fyrir tæplega 13 árum. Landrisið er meira en það var að hámarki fyrir síðasta gos og skjálftavirkni hefur aukist á umliðnum árum.

„Við þurfum í sjálfu sér ekki að hafa stórar áhyggjur af Grímsvötnum. Þetta eru gos sem myndu byrja með 10-15 kílómetra háum gosmekki sem yrði í gangi í rúman sólarhring, síðan færi að draga úr gosinu og innan þriggja daga yrði þetta hálfgert púður,“ segir Þorvaldur.

Frétt af mbl.is

Grímsvötn búin að fylla í alla dálkana

Hann segir að gjóskufallið myndi afmarkast við jökulinn og fólk gæti kannski fundið eitthvað fyrir áhrifum í sveitunum í kring. 

Magnús Tumi Guðmundsson, prófessor í jarðeðlisfræði við Háskóla Íslands, sagði við mbl.is í síðasta mánuði að Grímsvötn séu búin að „fylla í alla dálkana“ í undirbúningsferli sínu fyrir eldgos.

Tengdar fréttir

Grímsvötn

Fylgjast vel með: Fleiri skjálftar en fyrir gos 2011

• Nýjar gervihnattamyndir sýna tvo sigkatla
• Rafleiðni og órói á niðurleið
• Órói tengist suðu í jarðhitakerfinu
• 2,7 stiga skjálfti í Bárðarbungu

» Fleiri tengdar fréttir

• Blogga um frétt