Innlent | mbl | 8.2.2024 | 20:50 | Uppfært 21:42

Heita vatnið þrýtur

mbl.is/Kristinn Magnússon

Varabirgðir heits vatns þrjóta að öllum líkindum um klukkan 21 í kvöld. Unnið er að vinnu við bráðabirgðalögn sem búið var að koma í jörðu.

Reiknað er með að sú vinna standi yfir að minnsta kosti fram á seinni part morgundagsins. Þetta kemur fram í tilkynningu frá almannavörnum á bæði íslensku og ensku.

Búast má við því að þegar viðgerð lýkur taki það nokkurn tíma að ná rennsli á ný sem þýðir að fólk gæti þurft að fara mjög sparlega með vatnið fyrst þegar því verður hleypt á á nýjan leik.

Frétt af mbl.is

Stefnir í að heitavatnslaust verði í kvöld

Köld nótt framundan

Almannavarnir minna fólk á að nota raftæki á borð við rafmagnshitara sparlega, eftir þörfum og taka þannig tillit til annarra. Þá er minnt á mikilvægi þess að hafa opna glugga þegar gas er notað og að slökkva á öllu gasi áður en fólk fer að sofa sem og að setja gaskútinn út fyrir dyr.

Aldrei á að nota gas í lokuðu rými innanhúss og yfir nótt, mikilvægt er að lofta um rými þar sem gas er í notkun.

Hvetja almannavarnir fólk til að huga að nágrönnum sínum.

„Það er ekki víst að öll hafi haft tækifæri til að verða sér úti um hitara eða skilji þær leiðbeiningar sem sendar hafa verið út í dag um takmörkun á notkun þeirra.“

Í tilkynningunni segir að álagið geti orðið þannig að heilu hverfin detti út og því sé mikilvægt að íbúar standi saman.

Almannavarnir ítreka að ástandið er tímabundið og mun vara að öllum líkindum fram á seinni part morgundagsins.

Announcement from the civil defence

Ráð til þess að sporna við varmatapi:

• Loka hurðum

• Loka gluggum, gæti þurft að þétta opnanleg fög meira en venjulega

• Draga fyrir glugga

• Byrgja fyrir stóra glugga t.d. með stóru teppi

• Klæða sig í hlý föt svo sem ullarsokka, hlýjar peysur o.fl.

• Ef hitað var upp vatn til eldunar mats að hella því ekki að eldamennsku lokinni, láta það standa til þess að hita upp rými

Frétt af mbl.is

Eldgos á Reykjanesskaga

Fyrir þá íbúa sem hyggjast nota gashitara til að hita upp húsin sín á meðan ástandið varir er mikilvægt að hafa eftirfarandi þætti í huga:

1. Huga þarf að loftskiptum í rýminu, ef rýmið er mjög loftþétt þá geta safnast upp skaðlegar lofttegundir. Hægt er að huga að loftskiptum með því að loka ekki hurðum í litlum rýmum og jafnvel loftræsta með viftu.

2. Setja ætti upp gasskynjara í rýmum þar sem fólk hefst við, gas er þyngra en loft þess vegna skal staðsetja gasskynjara niður við gólf.

3. Ekki yfirgefa rými þar sem verið er að kynda með gasi. Gott er að kynda í stuttum törnum.

4. Gas lyktar illa stundum talað um rotið egg, ef þú finnur slíka lykt skaltu loka fyrir gasið strax. Í kjölfarið er mikilvægt að fara yfir tengingar til að athuga hvort allar þéttingar séu til staðar.

5. Örugg notkun, með því að nota hitunartækið eins og framleiðandi gerir ráð fyrir, og gæta þess að gaskúturinn/hylkið standi upprétt. Ef gaskúturinn leggst á hliðina breytist gasið í vökva og við það myndast eldstungur.

6. Gættu að því að ekkert eldfimt sé nálægt hitaranum t.d nælonefni, blöð, gardínur, gashylki osfrv.

7. Ekki láta börn eða dýr vera eftirlitslaus í kringum gashitara. Börn geta brennt sig og velt hitaranum um koll.

8. Við notkun á gashitunartæki getur myndast Kolmónoxíð, kolmónoxíð getur verið lífshættulegt ef ekki er brugðist við í tíma. Einkenni kolmónoxíðseitrunar eru: höfuðverkur, svimi, ógleði og rugl eða doði.

Ef fólk finnur fyrir einhverjum af þessum einkennum skal það loftræsta svæðið strax og fara í ferskt loft.

9. Munum eftir öðrum valkostum til upphitunar svo sem kúra saman undir teppi, klæða sig í ullarsokkana sem amma gaf okkur í jólagjöf. Draga gluggatjöld fyrir glugga.