Innlent | mbl | 8.2.2024 | 11:07

Hvetja íbúa á Suðurnesjum til að lækka í hitakerfum

Hraun flæðir yfir Grindavíkurveg. mbl.is/Kristinn Magnússon

Hraunflæðið úr eldgosinu sem hófst í morgun rennur nú í átt að stofnlögn sem flytur heitt vatn frá Svartsengi til Fitja í Reykjanesbæ.

Íbúar og fyrirtæki á Suðurnesjum eru hvött til að lækka í hitakerfum í húsum og nota ekki heitt vatn til baða.

Frétt af mbl.is

Búa sig undir heitavatnsleysi á Suðurnesjum

„Fari hraunflæði yfir lögnina er útlit fyrir að sú sviðsmynd raungerist að ekkert heitt vatn frá Svartsengi með þeim afleiðingum að heitavatnslaust verður í Reykjanesbæ, Suðurnesjabæ, Grindavík og Vogum. Eins og hraðinn er á hraunflæðinu núna gæti það gerst á næstu klukkustundum,” segir í tilkynningu frá HS Veitum.

Til að bregðast við slíkum atburði sem þessum hefur verið unnið að lagningu nýrrar heitavatnslagnar í jörðu á þessu svæði.

Búið er að leggja um 500 metra langan kafla þar sem ætlunin er að tengja ef gamla lögnin eyðileggst. Það getur aftur á móti tekið einhverja daga að koma nýju lögninni í gagnið.

Frétt af mbl.is

Í forgangi að loka skörðum í varnargörðum

Ekki nota heitt vatn til baða

„Búið að fylla á heitavatnstankana á Fitjum en til þess að heitavatnsbirgðirnar endist sem lengst til að halda hita á húsunum á þessu svæði biðjum við íbúa og atvinnulíf að lækka í hitakerfum í húsum og vera ekki að nota heitt vatn til baða í sturtu, baðkörum eða heitum pottum. Nú þegar er búið að skerða afhendingu á heitu vatni til stórnotenda,” segir jafnframt í tilkynningunni.

„Einnig er nú viðbúið að gripið verði til rafkyndingar sem rafdreifikerfi okkar er ekki hannað fyrir. Er biðlað til húseigenda að bíða með að hefja rafkyndingu í lengstu lög.“

Tekið er fram að reyna muni á samtakamátt íbúa, ef til þess komi, að hámarka rafkyndingu við 2,5 kW á hverja íbúð og fara á sama tíma í raforkusparandi aðgerðir.

Fram kemur að hættan af of miklu álagi á rafdreifikerfið, jafnvel frá einni íbúð sé sú að öll gatan eða jafnvel allt kerfið slái út með tilheyrandi hættu á bilunum í jarðstrengjum eða dreifistöðvum. Það gæti tekið langan tíma að laga.

Ábendingar til íbúa frá HS Veitum