HR ekki tekið ákvarðanir um skólagjöld

Háskólinn í Reykjavík hefur ekki tekið neinar ákvarðanir um breytingar á skólagjöldum sínum. 

Áslaug Arna Sig­ur­björns­dótt­ir, há­skóla-, iðnaðar- og ný­sköp­un­ar­ráðherra, hef­ur boðið skóla­stjórn­end­um sjálf­stætt starf­andi há­skóla að skól­arn­ir hljóti óskert fjár­fram­lög frá rík­inu gegn af­námi skóla­gjalda.

Frétt af mbl.is

Fjármagn fylgir nemendum óháð rekstrarformi

Dr. Ragnhildur Helgadóttir, rektor HR, segir í samtali við mbl.is skólayfirvöld hafa vitað að þessar breytingar væru til skoðunar í ráðuneytinu. Formleg tilkynning barst svo skólanum í morgun. 

„Nú verður bara sest yfir þetta hjá stjórnendum og stjórn. Reiknilíkan er enn í mótun fyrir næsta ár þannig að sumu leyti er allt umhverfið pínulítið í mótun. Þess vegna vildum við bíða eftir því að þetta kæmi formlega út og taka afstöðu þegar það lægi fyrir, “ segir hún. 

Ragnhildur segir að sú vinna muni klárast hratt og örugglega. Á ári hverju er miðað við að hafa allar upplýsingar um námið á hreinu fyrir Háskóladaginn. Hann verður haldinn 2. mars í ár og þá geta nemendur kynnt sér námsframboðið sem í boði er hér á landi. 

Fyrr í dag tilkynnti Listaháskóli Íslands að skólagjöld í skólanum verði felld niður frá og með haust­inu 2024.

Frétt af mbl.is

Skólagjöld verða felld niður hjá LHÍ

• Blogga um frétt