1.500 fleiri aðgerðir á Landspítala

Samningurinn var undirritaður árið 2021 en lengi hafði verið stefnt að því að spítalinn, sem er grunnstoðin í íslenskri heilbrigðisþjónustu, yrði keyrður eftir slíku kerfi. Með því eru afköst spítalans á hverjum tíma beintengd við þann árangur sem hann sýnir við veitingu þjónustu. Kerfi af þessu tagi hefur verið við lýði við margar öflugustu heilbrigðisstofnanir Evrópu um langt árabil.

5% umfram væntingar

Samkvæmt upplýsingum Morgunblaðsins stóð Landspítalinn undir þeim kröfum sem lagt var upp með og gott betur. Þannig hafi afköst starfseminnar verið 5% umfram áætlanir.

Á fjáraukalögum samþykkti Alþingi sérstaka aukafjárveitingu til spítalans til þess að umbuna honum að miklu leyti fyrir þá auknu þjónustu sem hann veitti á liðnu ári.

Samkvæmt fyrrgreindu uppgjöri fjölgaði skurðaðgerðum á Landspítala um tæp 8% milli áranna 2022 og 2023. Jafngildir það 1.500 aðgerðum eða um 30 aðgerðum í viku hverri. Þá hækkaði einnig hlutfall aðgerða sem framkvæmdar eru án sólarhringsinnlagnar. Legudögum á spítalanum fjölgaði um liðlega 4% og þjónusta dag- og göngudeilda jókst um tæplega 8% milli ára.

Gestur Spursmála í dag

Rafræn samskipti við sjúklinga jukust um 7% og er það í samræmi við áherslur stjórnenda spítalans á að ýta stofnuninni áfram í átt til frekari tækniþróunar.

Í svari spítalans við fyrirspurn Morgunblaðsins segir að það sé markmið stofnunarinnar að halda sig ætíð innan fjárheimilda og eiga í góðu samstarfi við heilbrigðisyfirvöld og Alþingi þegar ófyrirséð verkefni á heilbrigðissviði kalli á aukin útgjöld.

Þá segir þar einnig að spítalinn vilji nýta fjárheimildir sínar vel til að gera góða þjónustu við sjúklinga betri.

„Vonir standa til að yfirstandandi skipulagsbreytingar á Landspítala verði til þess að efla þjónustuna enn frekar og auka getu spítalans til að takast á við viðvarandi áskoranir í starfseminni.“

Runólfur Pálsson forstjóri Landspítalans verður gestur Spursmála á mbl.is klukkan 14 í dag.