Háskólinn í Reykjavík afnemur ekki skólagjöld

Háskólinn í Reykjavík mun ekki afnema skólagjöld. Þetta kemur fram í tilkynningu frá skólanum.

Þar segir að rekstrartekjur skólans myndu skerðast um 1.200 milljónir á ári með því að samþykkja hugmynd háskóla,- iðnaðar- og nýsköpunarráðuneytisins um aukið ríkisframlag.

Áslaug Arna Sig­ur­björns­dótt­ir, há­skóla-, iðnaðar- og ný­sköp­un­ar­ráðherra, hef­ur boðið skóla­stjórn­end­um sjálf­stætt starf­andi há­skóla að skól­arn­ir hljóti óskert fjár­fram­lög frá rík­inu gegn af­námi skóla­gjalda. Lista­há­skóla Íslands mun fella niður skólagjöld frá og með haust­inu 2024.

Frétt af mbl.is

Fjármagn fylgir nemendum óháð rekstrarformi

Nemendur mótfallnir breytingum á skólagjöldum

Í tilkynningunni segir að í ályktun frá Stúdentafélagi Háskólans í Reykjavík (SFHR) komi fram að nemendur vilji halda í sérstöðu skólans sem mörkuð var við stofnun hans fyrir 26 árum. 

Frétt af mbl.is

SFHR leggst gegn afnámi skólagjalda

„Á opnum samráðsfundi nemenda HR vegna tilboðsins kom sterkt fram að nemendur í HR leggja mikið upp úr góðri aðstöðu, persónulegri kennslu, nútímalegum kennslubúnaði og framúrskarandi þjónustu við nemendur.

Við í stúdentaráði teljum ómögulegt að halda þessari sérstöðu sem nemendur í HR kjósa með svona fjárskerðingum. Sérstaða HR er að miklu leyti möguleg vegna fullnægjandi fjármögnunar,“ segir í ályktun SFHR.

Mikilvægt að nemendur hafi val

Ragnhildur Helgadóttir, rektor HR, segir að stjórn og stjórnendur vilji áfram geta boðið stúdentum upp á það val sem þau hafa í dag.

Frétt af mbl.is

Ákvörðunin undir háskólunum komin

„Nemendum hér býðst að langstærstum hluta að stunda nám í sömu greinum við aðra skóla, en velja að koma til okkar þótt við innheimtum skólagjöld, sem eru á þessu skólaári 288 þúsund krónur á önn, og njóta þess sem HR býður. Við viljum að þeim standi það áfram til boða,“ segir Ragnhildur í tilkynningu.

Þá ítrekar hún einnig ályktun SFHR og segir mikilvægt að hlusta á nemendur. 

Boð ráðherra skerðir heildarfjármagn til háskóla

Í tilkynningunni segir einnig að breytingarnar sem Áslaug Arna hefur kynnt þýði ekki að verið sé að auka við það fjármagn sem fer inn í háskólakerfið í heild sinni heldur er verið að breyta því hvernig kökunni er skipt. 

„Þetta þýðir með öðrum orðum að heildarfjármagn til háskólanna myndi minnka um ríflega 3 milljarða króna, ef allir skólar tækju þessu boði. Það myndi koma alvarlega niður á starfsemi fleiri skóla en okkar.“

• Blogga um frétt