Óhætt er að segja Slökkvilið höfuðborgarsvæðisins hafi unnið þrekvirki í brunanum í Fellsmúla í gærkvöldi, er tókst að hefta frekari útbreiðslu eldsins og að hann kæmist í Hreyfilshúsið. Ljósmyndarar Morgunblaðsins og mbl.is voru á vettvangi og mynduðu baráttuna við eldhafið.

Slökkviliðið var kallað út um hálfsex síðdegis í gær. Allt tiltækt lið kom á vettvang og þegar mest lét voru um 100 slökkviliðsmenn að störfum og 20 lögreglumenn gættu öryggis við brunastað. Um kvöldmatarleytið virtist sem tekist hefði að ráða niðurlögum eldsins en fljótlega blossaði hann upp aftur og náði hámarki á níunda tímanum. Þá náðist að koma í veg fyrir að eldurinn læsti sig í fleiri rými á efri hæð byggingarinnar á horni Fellsmúla og Grensásvegar.

Slökkvistarf hélt áfram fram á nótt og slökkviliðið vaktaði staðinn til morguns. Rannsókn á eldsupptökum er hafin eins og fram hefur komið á mbl.is.

Myndir segja meira en fleiri orð.