Starfsmenn Hraunvallaskóla með hettusótt

Veirusjúkdómurinn hettusótt hefur greinst meðal starfsmanna Hraunvallaskóla í Hafnarfirði. Nemendum verður boðinn bólusetning í skólanum.

Þetta kemur fram í bréfi sem sóttvarnarlæknir sendi starfsfólki skólans og foreldrum barna á fimmtudag.

Á miðvikudag var greint frá því að í byrj­un fe­brú­ar hefði hettu­sótt greinst á höfuðborg­ar­svæðinu.

Frétt af mbl.is

Hettusótt greindist á höfuðborgarsvæðinu

Í kjölfarið hvatti Guðrún Asp­e­lund sótt­varna­lækn­ir fólk að fara í bólu­setn­ingu við hettusótt, ef við ætti, en hettu­sótt getur smit­ast á milli þeirra sem eru óbólu­sett­ir eða meðal þeirra sem ekki hafa fengið hettu­sótt áður. Þeir sem eru tvíbólusettir eru í lítilli hættu að smitast. Guðrún kvaðst þó ekki eiga von á víðtækri út­breiðslu sjúkdómsins.

Frétt af mbl.is

Segir fólki að huga að bólusetningu við hettusótt

Óbólusett starfsfólk hvatt til að þiggja bólusetningu

Bólusetning gegn hettusótt hófst hér á landi árið 1989. Fólk sem er fætt á árunum 1985–1987 getur verið næmt fyrir hettusótt ef það hefur ekki fengið bólusetningu á fullorðinsárum. Eldri ár­gang­ar eru álitn­ir al­mennt ónæm­ir vegna tíðra hettu­sóttar­far­aldra sem gengu fram til 1984.

Í bréfinu til starfsfólks Hraunvallaskóla og foreldra barna hvetur sóttvarnaræknir sérstaklega óbólusett starfsfólk sem er fætt á tímabilinu 1980–1987 til að þiggja bólusetningu á heilsugæslunni.

„Bóluefni gegn hettusótt eru jafnan samsett bóluefni með mislingum og rauðum hundum. Bólusetningin er gjarnan skammstöfuð MMR í skírteinum, dæmi um sérlyfjaheiti sem geta komið fram í Heilsuveru eru M.m.r.ii, Priorix og M-M-R-VAXPRO

Boðið verður upp á bólusetningu í skólanum á næstu dögum, fyrir öll börn sem ekki hafa fengið tvo skammta af MMR. Óbólusett starfsfólk, sérstaklega fólk sem er fætt á tímabilinu 1980–1987, er hvatt til að þiggja bólusetningu á heilsugæslunni,“ segir í bréfi sóttvarnarlæknis.

• 1 blogg um fréttina

Bloggað um fréttina

• Birgir Örn Guðjónsson: Hettusótt !