Karlmaður sem dæmdur var í fjögurra ára fangelsi í síðustu viku fyrir tvær hrottalegar árásir gagnvart fyrrverandi kærustu sinni er laus úr varðhaldi. Þetta er niðurstaða Landsréttar sem felldi úr gildi gæsluvarðhaldsúrskurð héraðsdóms sem hafði dæmt hann í varðhald fram í ágúst með vísan í almannahagsmuni.
Dómur í máli mannsins féll 13. febrúar, en hefur ekki enn verið birtur. Tveimur dögum síðar féllst héraðsdómur á að framlengja gæsluvarðhald yfir manninum um hálft ár, eða meðan áfrýjunarfrestur er í gildi. Kærði maðurinn þá niðurstöðu beint til Landsréttar.
Landsréttur vísaði til þess að þó að maðurinn hafi verið sakfelldur fyrir grófar árásir á konuna, sem og fíkniefnalagabrot, þá hafi ekki verið fallist á að um hafi verið að ræða tilraun til manndráps.
Hægt er að halda mönnum í gæsluvarðhaldi til lengri tíma ef talið er að brot þeirra varði meira en 10 ára fangelsi, eða ef almannahagsmuni krefjist þess. Niðurstaða héraðsdóms var að sakfella manninn fyrir sérstaklega hættulegar líkamsrárásir, en ekki tilraun til manndráps. Er vísað til þess að héraðsdómur hafi komist að þeirri niðurstöðu að maðurinn hafi ekki á verknaðarstundu haft ásetning til að bana konunni. Leiddi þetta til fjögurra ára dóms og þar með uppfyllti það ekki 10 ára viðmiðið.
Landsréttur þurfti því að meta hvort almannahagsmunir krefðust þess að maðurinn sæti áfram inni meðan á áfrýjunarfresti stendur.
Var það niðurstaða Landsréttar, með vísan í dóm héraðsdóms og dómaframkvæmd, að ekki væru viðhlítandi rök fyrir því að nauðsynlegt væri að maðurinn sæti áfram í varðhaldi með tilliti til almannahagsmuna. Var úrskurður héraðsdóms því felldur úr gildi.
Maðurinn hefur sætt varðhaldi frá 4. september í fyrra, í kjölfar þess að hann var handtekinn fyrir að hafa ráðist gegn konunni í skóglendi í lok ágúst. Hafði maðurinn meðal annars sparkað ítrekað í konuna og þá sérstaklega í höfuð hennar. Í ákæru málsins er einnig greint frá því að maðurinn hafi reynt að kyrkja konuna og haldið henni með kyrkingataki þar sem hún var með höfuðið undir vatni í nærliggjandi læk.
Telja má næst kraftaverki að gangandi vegfarandi hafi komi þar að, en við það hætti maðurinn barsmíðum og hljóp á brott.
Konan var nefbeins- og andlitsbrotin eftir árásina og með opið sár á höfði, marga marbletti á höfði, hálsi og víðar um líkamann. Í læknisvottorði sem lögreglan studdist við frá sérfræðilækni sagði jafnframt að talið sé að áverkar konunnar hafi verið í samræmið við áverkasöguna um kyrkingar og höggin. Þá sagði jafnframt að slík ákverkalýsing gæti hafa verið lífshættuleg.
Vitni sem átti leið eftir stíg í skóglendinu varð var við árásina og sagðist hafa séð mann lemja konu og stappa ofan á höfði hennar. Lýsti vitnið því að hafa séð manninn beygja sig niður að konunni og byrja að kyrkja hana og sagt: „Á ég ekki bara að svæfa þig, klára þetta núna?“