Aðeins fyrsta skrefið í hælisleitendamálum

Guðrún Hafsteinsdóttir dómsmálaráðherra segir að frumvarp um breytingar á útlendingalögum sé aðeins fyrsta skrefið í umbótum hælisleitendakerfisins. Annars sé að vænta þegar í haust. Stjórnarflokkarnir hafi sammælst um að taka utan þessi mál af meiri þunga en áður, en þar verði m.a. horft til annara Norðurlanda með ábyrgð, festu og mannúð að leiðarljósi.

Þetta kemur fram í viðtali við Guðrúnu í Dagmálum, streymi Morgunblaðsins á netinu, sem opið er öllum áskrifendum. Viðtalið verður birt í fyrramálið.

Hún segir að frumvarp um lokað búsetuúrræði sé ofarlega á blaði yfir nauðsynlegar úrbætur, þó ekki séu allir á eitt sáttir um það. Eftir sem áður sé Ísland aðili að Schengen-samstarfinu og beri samkvæmt því að hafa slík úrræði.

Langur aðdragandi

Guðrún segir að framkomið frumvarp um breytingar á lögum um hælisleitendur hafi tekið langan tíma í undirbúningi, það hafi átt sér margra mánaða aðdraganda.

Það sé því fráleitt að gera því skóna að hugarfarsbreyting Kristrúnar Frostadóttur, formanns Samfylkingarinnar, í hælisleitendamálum hafi nokkru breytt um það eða umræðuna. Hún sé ekki ný af nálinni.

Mette fyrirmynd Kristrúnar

„Ég held að Kristrún Frostadóttir eigi eina stóra fyrirmynd í sínu pólitíska lífi og það er Mette Frederiksen. Ég sé ekki betur en að Kristrún horfi mjög til Mette og hvað hún er að gera. Mette, leiðtogi jafnaðarmanna í Danmörku, gerði miklar breytingar á kerfinu í Danmörku. Þar voru útlendingalög hert mjög og ég held að Kristrún sé fyrst og síðast að leita í þann farveg.“

Guðrún tekur undir að fleiri en formaður Samfylkingar hafi minnst á að Íslendingar ættu ekki að skera sig úr frá hinum norrænu þjóðunum að þessu leyti og minnir á að hún sé þar á meðal.

„Ég hef sagt þetta, að við eigum að fylgja Norðurlöndunum.“

Næsta skrefið stigið í haust

Þegar hún er spurð um af hverju núverandi frumvarp hafi ekki dregið meiri dám af löggjöf á öðrum Norðurlöndum segir hún að hér ræði aðeins um fyrsta skrefið í breytingu á fyrirkomulagi hælisleitendamála. Næsta skrefs verði ekki lengi að vænta.

„Í haust. Við [stjórnarþingmenn] erum búnir að sammælast um það að við ætlum að taka þennan málaflokk mjög föstum tökum. Við ætlum að gera það vel. Með festu, ábyrgð og mannúð að leiðarljósi.“

Lokað búsetuúrræði við Leifsstöð í bígerð

Guðrún nefnir að framundan séu áform um svokallað lokað búsetuúrræði fyrir nýkomna hælisleitendur meðan á frumathugun á málum þeirrar stendur, en einnig þeirra sem fá synjun á hælisbeiðni og ber að yfirgefa landið. Frumvarp um það sé nú þegar í samráðsgátt.

„Við erum að setja á fót spretthóp sem fer yfir möguleika móttöku- og búsetumiðstöðvar á öllum málsmeðferðarstigum,“ segir dómsmálaráðherra.

„Við erum aðilar að Schengen-samstarfinu og við erum eina ríki þess, sem er ekki með [lokað búsetuúrræði]. Okkur ber að gera það.“

Hún vill bíða niðurstöðu spretthópsins áður en hún ræðir það fyrirkomulag nánar, en segir þó að það þurfi að vera í nágrenni við Leifsstöð.

• Blogga um frétt