Innlent | mbl | 23.2.2024 | 18:23

Eldgos hefur áhrif á Selfossi

Bergþóra Þorkelsdóttir, forstjóri Vegagerðarinnar er spör á orðin þegar hún er spurð út í hvað valdi því að verktakar hafi horfið frá þátttöku í útboðsferli nýrrar Ölfusárbrúar sem ætlunin er að taka í notkun að tveimur árum liðnum.

Vegagerðin óskaði eftir þátttakendum í fyrirhuguðu útboði að gerð brúarinnar snemma á síðasta ári og í lok nóvember síðastliðins var þeim fimm fyrirtækjum sem vildu taka þátt í útboðinu send gögn varðandi það.

Heimildir mbl.is herma að öll fyrirtækin að ÞG Verk ehf. undanskildu hafi nú dregið þátttöku sína í útboðsferlinu til baka.

Verkefnið á viðkvæmum stað

„Ég held að það sé ekki gáfulegt fyrir mig að ræða við þig um Ölfusárbrú meðan hún er enn í útboðsferli og því ferli lýkur ekki fyrr en í mars. Þannig að ég held að ég verði bara að fá að koma aftur til þín til að tala um það."

Brúin yfir Ölfusá er komin til ára sinna og nú er stefnt að nýrri slíkri ofan við byggðina. mbl.is/Sigurður Bogi

- En getið þið tjáð ykkur. Þetta virðist vera í mikilli úlfakreppu.

„Og það eru allskonar ástæður sem, ég get bara sagt að það er ekki samhljómur, það er ekki ein ástæða.“

- Hefur þú áhyggjur af stöðunni?

„Ég hef áhyggjur af því þegar óöryggi grípur um sig. Við erum líka, bara það að það gýs hér í hverjum mánuði hefur áhrif. Það er eldgos á Íslandi í hverjum mánuði. Og þegar maður situr sem verktaki úti í heimi þá finnst manni það ekki traustvekjandi í 50 kílómetra fjarlægð frá staðnum þar sem maður ætlar... þú skilur.“

- Er það að hafa áhrif núna?

„Ja, það er eitt af því sem er nefnt, bara til að gefa vísbendingar. En þetta verkefni er í útboðsferli og ég tel ekki tímabært að ræða það.“

Fimm stimpluðu sig inn

Þau fyrirtæki sem sóttu um þátttöku í útboðinu eru:

Hochtief Infrastructure GmbH frá Essen í Þýskalandi, IKI Infrastructure Systems Co., frá Tókíó í Japan, Ístak og Per Aarsleff A/S - freyssinet Int. fyrir hönd óstofnaðs félags í Reykjavík, Puentes y Calzada Infraestructuras, S.L.U. á Spáni og ÞG verktakar í Reykjavík.

Viðtalið við Bergþóru Þorkelsdóttur, forstjóra Vegagerðarinnar má sjá og heyra í heild sinni hér: