Innlent | Morgunblaðið | 24.2.2024 | 9:35

Telur Rússa hafa áætlanir fyrir Keflavíkurflugvöll

Vladimír Pútín Rússlandsforseti og herþota norska hersins á Keflavíkurflugvelli. Samsett mynd/AFP/Eggert Jóhannesson

Líklegt þykir að borgaralegir innviðir á borð við flugvelli væru ofarlega á skotmarkalista Rússa, komi til þess að þeir ráðist á ríki Atlantshafsbandalagsins á næstu árum.

„Góðu fréttirnar fyrir Ísland eru að ég held ekki að landið ykkar yrði forgangsskotmark fyrir Rússa þegar kæmi að stigmögnun átakanna,“ segir Fabian Hoffmann, sérfræðingur í varnarmálum og eldflaugahernaði, í ítarlegu samtali í Morgunblaðinu sem kom út á fimmtudag.

„Það eru stefnusmiðir í Evrópu sem eru nær Rússum og eru mikilvægari skotmörk fyrir þá,“ segir hann þegar talið berst að Keflavíkurflugvelli og varnarviðbúnaði Íslendinga.

Frétt af mbl.is

Líklegt að ráðist yrði á Keflavíkurstöð í stríði

Slæmu fréttirnar

„Slæmu fréttirnar eru þær að það eru engu að síður miklar líkur á því að Ísland yrði fyrir árásum, því að landið yrði að mikilvægri miðstöð fyrir Bandaríkjamenn og liðsflutninga þeirra til Evrópu, og það eru engar líkur á því að Rússar myndu líta framhjá því,“ segir Hoffmann, sem bætir við að hann hafi þó ekki innsýn í það hvernig Rússar teldu sig best geta mætt þeirri hættu.

„En ég er nokkuð viss um að þeir hafa áætlanir um hvernig þeir muni takast á við þennan flugvöll og mögulegan liðssafnað Bandaríkjamanna þar,“ segir Hoffmann.

Frá sjónarhóli Rússa myndu þeir hafa nokkuð góða ástæðu til þess að ráðast á Keflavík, ekki síst ef átökin dragast á langinn og Bandaríkjamenn fara að senda herlið yfir Atlantshafið í stórum stíl.

Tvö ár eru liðin um þessar mundir frá því Rússar réðust inn í Úkraínu. Þessum tímamótum hafa verið gerð góð skil í Morgunblaðinu síðustu daga og svo verður áfram næstu daga.