Innlent | mbl | 1.3.2024 | 15:38

„Engin áföll hindrað starfið í dag“

Ástráður ræðir við fulltrúa Samtaka atvinnulífsins í Karphúsinu í dag. mbl.is/Kristinn Magnússon

Það er fundað stíft í Karphúsinu í dag en kjaraviðræður breiðfylkingar stéttafélaga og Samtaka atvinnulífsins voru teknar upp að nýju í morgun. Líklega mun fundurinn standa yfir eitthvað fram eftir degi og stefnt er því að samningsaðilar fundi aftur á morgun að sögn Ástráðs Haraldssonar ríkissáttasemjara.

Frétt af mbl.is

Þráðurinn tekinn upp að nýju í Karphúsinu

Klukkan 9 hófst fundur breiðfylkingarinnar og Samtaka atvinnulífsins og eftir hádegi var fundur samninganefndar Eflingar með SA.

„Fundir halda áfram og við erum bara að vinna eftir skipulagi. Það eru fundir í einstökum vinnuhópum sem fjalla um einstök kjaraatriði og það er misjafnt hverjir eiga aðild að þeim umræðum hverju sinni,“ segir Ástráður Haraldsson ríkissáttasemjari við mbl.is.

Frétt af mbl.is

Efling mætir aftur til fundar

Er að síga aftur í gang

„Það verður fundað eitthvað fram eftir degi og ef guð lofar þá höldum við áfram á morgun,“ segir Ástráður.

Er kominn góður gangur í viðræðurnar?

„Ég myndi segja að þetta sé að síga aftur í gang. Það hafa ekki nein áföll hindrað starfið í dag og þá stefnir þetta um skeið að minnsta kosti í rétta átt.“