Innlent | mbl | 4.3.2024 | 18:41 | Uppfært 5.3.2024 13:20

Jón stökk til og aðstoðaði lögreglu

Á myndbandi af atviki þar sem maður fór yfir handriði og gerði sig líklegan til að valda sér skaða sést Jón Gunnarsson aðstoða lögreglu hér lengst til hægri á skjáskoti.

Jón Gunnarsson, þingmaður Sjálfstæðisflokks og fyrrum dómsmálaráðherra, stökk til þegar háreisti hófst á þingpöllum og greip í mótmælanda sem virtist ætla að skaða sjálfan sig.

„Þetta voru engin stórræði. Ég stökk til að hjálpa lögreglu því það var einn lögreglumaður sem var að reyna að fást við manninn. Ég lít bara á það sem borgaralega skyldu mína að aðstoða lögreglu ef aðstæður eru þannig,“ segir Jón.

Frétt af mbl.is

Myndskeið: Uppnám á Alþingi

Að sögn Jóns var hann inni í þingsal þegar atvikið kom upp og hann segist hafa hlaupið til án umhugsunar.

„Maður sá það strax að atvikið var alvarlegt. Lögreglumaðurinn var að halda manninum sem virtist ætla að henda sér niður í þingsal á þá sem voru þarna fyrir neðan,“ segir Jón.

Að sögn hans komu þingvörður og annar lögreglumaður að manninum um svipað leyti og hann og málin leystust á nokkrum sekúndum.

„Hann gafst bara upp um leið og hann fann að við ofurefli var að etja,“ segir Jón.