Innlent | mbl | 4.3.2024 | 19:55 | Uppfært 21:39

Segir ábyrgt að horfa raunsætt á hælisleitendamál

Jóhann Páll Jóhannsson, þingmaður Samfylkingarinnar. mbl.is/Árni Sæberg

Jóhann Páll Jóhannsson, þingmaður Samfylkingar telur að takmörk séu fyrir því hversu mörgum hælisleitendum sé hægt að taka við á hverjum tíma og segir mikilvægt að horfa raunsætt á hælisleitandamál.

Þetta kom fram í ræðu Jóhanns þegar breytingar á útlendingalögum voru til umræðu á Alþingi í dag. Kveður við sambærilegan tón og fram kom í máli Kristrúnar Frostadóttur, formanns flokksins á dögunum. Hún sagði þó ekki um stefnubreytingu að ræða hjá Samfylkingu.

Frétt af mbl.is

Ekki sérstök stefnubreyting

Jóhann sagði ennfremur í ræðu sinni það vera grundvallaatriði að sambærilegar reglur séu á Íslandi og í öðrum löndum. Þá telur hann að sýn ríkisstjórnarinnar um hraðari málsmeðferð sé um margt ágætt og tekur undir með þeim sjónarmiðum að gæta þurfi þess að kerfin standi undir verkefni hælisleitendamála.

Getum ekki lokað augunum

„Það hversu opið eða lokað regluverkið er í hverju ríki fyrir sig hefur áhrif á það hvert fólk leitar, hversu margir sækja um vernd á hverjum stað.

Við sem viljum að hér sé tekið sé vel á móti fólki, við getum ekkert lokað augunum fyrir þessu.

Við þurfum að gæta þess að bæði reglurnar og framkvæmd reglnanna sé ekki algerlega úr takti við það sem tíðkast í löndunum í kringum okkur, að regluverkið sé ekki þannig að umsækjendur um alþjóðlega vernd leiti miklu frekar hingað en til annarra landa,“ segir Jóhann.

Varkárni og raunsætt mat

Þannig hljóta ábyrgir stjórnmálamenn að nálgast verkefnið. Ekki bara út frá mannúð og mildi heldur líka út frá ákveðinni varkárni, raunsæju mati á því hvaða áhrif mikil fjölgun umsókna á skömmum tíma hefur á verndarkerfið okkar og samfélagið í heild,“ segir Jóhann.