Framboð af hentugu húsnæði á leigumarkaði minnkaði á milli haustmánaða 2022 og 2023. Samningsstaða leigjenda gagnvart leigusölum versnaði sömuleiðis.

Staðan versnaði mest á meðal leigjenda á aldrinum 35-44 ára, sem upplifðu meiri verðhækkanir og búa við þrengri kost en aðrir aldurshópar, að því er segir í tilkynningu frá Húsnæðis- og mannvirkjastofnun (HMS), sem framkvæmir á hverju ári mælingu á stöðu leigjenda.

Hentugt húsnæði af skornum skammti

Aldrei frá upphafi mælinga, eða frá árinu 2015, hefur framboð af hentugu húsnæði mælst jafnlítið og nú. Það hefur lækkað samfellt frá árinu 2020. Í aldursflokknum 35-44 ára er framboðið minna samanborið við aðra aldurshópa sem bendir til þess að hentugt húsnæðið fyrir fjölskyldufólk sé af skornum skammti.

Fram kemur í tilkynningunni að þriðji hver leigjandi taldi sig vera í sterkri samningsstöðu gagnvart leigusala í fyrrahaust, samanborið við 50% leigjenda á haustmánuðum 2022.

Leigan tók stökk

Í aldurshópnum 35-44 ára tók meðalfjárhæð leigu stökk milli ára úr 180 þúsund krónum frá fyrra ári í rúmlega 210 þúsund krónur, eða sem nemur 16,8% hækkun milli ára.

Hækkun meðalleigufjárhæðar er mest innan þessa hóps en í könnunni í heild nemur hækkun meðalleiguverðs 9,2% milli ára.

„Þeim fer fækkandi sem telja að samningsstaða sín gagnvart leigusala sé sterk en verst koma niðurstöður könnunar út fyrir aldurshópinn 35-44 ára. Ríflega fjórðungur þess hóps (26%) telur að samningsstaða sín sé sterk gagnvart leigusala en hlutfallið var 36% í könnun 2022. Í 2022 könnun í heild sinni taldi um annar hver svarandi (49%) að samningsstaða sín væri sterk gagnvart leigusala en í ár telur rétt rúmlega þriðji hver svarandi að svo sé (35%),” segir í tilkynningunni.

Tengdar fréttir

Húsnæðismarkaðurinn

Nýtt fjölbýlishús byggt í Skeifunni

• Færir borgarbúa nær hver öðrum
• Áætla að tíu þúsund íbúðir standi tómar á Íslandi
• Leiguverð spilar stærra hlutverk en áður
• Verulegur skortur á íbúðarhúsnæði blasi við

» Fleiri tengdar fréttir

• Blogga um frétt