„Trúi ekki öðru en að þetta séu einhver mistök“

Eigandi iðnaðarfyrirtækis í Hafnarfirði er gáttaður á niðurstöðu lögreglunnar um að fella niður mál þar sem innbrotsþjófur var gripinn glóðvolgur í fyrirtæki þeirra.

Þjófurinn var að rista sér brauð í eldhúsaðstöðu fyrirtækisins þegar tveir eigenda komu að manninum. Hann gerði sig líklegan til að ráðast á þá en annar eigenda hafði innbrotsþjófinn undir og hélt honum þar til lögreglan kom.

Aðkoman var miður geðsleg og hafði öllu verið rótað til og rúða brotin til að komast inn í fyrirtækið. Auk þess var búið að setja dót í tösku sem þjófurinn hafði að öllum líkindum ætlað að taka með sér.

Skrítin skilaboð til almennings 

Ingvar Sigurðsson er einn eigenda Vallarbrautar sem selur landbúnaðartæki en innbrotið átti sér stað í húsakynnum fyrirtækisins.

„Ég trúi ekki öðru en að þetta séu einhver mistök,“ segir Ingvar.

Bendir hann á að maðurinn hafi náðst á staðnum og verið leiddur í burtu í handjárnum. Því sé ekki eins og ónóg sönnunargögn séu til staðar.

„Manni finnst skrítið að saksóknari og lögregla vilji senda almenningi þau skilaboð að það sé í lagi að fremja húsbrot og skemmdarverk,“ segir Ingvar.

Frétt af mbl.is

Innbrotsþjófurinn var að rista sér brauð

Óska eftir rökstuðningi 

Hann segir að skiljanlega upplýsist sum innbrot ekki en í þessu tilfelli horfðu þeir upp á lögreglu fjarlægja manninn.

Ingvar segist hafa talað við saksóknara sem hyggst óska eftir skýrslu og rökstuðningi frá lögreglu um það hvers vegna málkið var látið niður falla. 

• Blogga um frétt