Skýrist í dag hvort Hera fer út

Óvíst er hvort Hera Björk Þórhallsdóttir, sem vann Söngvakeppnina með laginu Scared of Heights, fer út fyrir Íslands hönd í Eurovision-söngvakeppnina, sem að þessu sinni fer fram í Malmö í Svíþjóð.

Ríkisútvarpið og framkvæmdastjórn Söngvakeppninnar hafa haldið spilunum þétt að sér síðan Hera Björk bar sigur úr býtum í Söngvakeppninni og ekki gefið upp hvort ákvörðun hafi verið tekin um hvort Ísland taki þátt í keppninni eða ekki.

Höfundur ætlar ekki út

Ásdís María Viðarsdóttir, höfundur Scared of Heights, sagði í viðtali við Ríkisútvarpið á föstudag að hún hefði sjálf tekið ákvörðun um að fylgja laginu ekki alla leið út til Malmö, þó að Ríkisútvarpið tæki ákvörðun um að Ísland tæki þátt.

Fjöldi íslenskra tónlistarmanna hefur þrýst á Ríkisútvarpið að taka ekki þátt í keppninni í ár. Rúmlega 500 tónlistarmenn skrifuðu undir áskorun þess efnis í janúar.

Vilja tónlistarmennirnir að Ríkisútvarpið sniðgangi keppnina vegna átakanna fyrir botni Miðjarðarhafs, en Ísrael er á meðal þátttökuríkja í Eurovision.