Heilbrigðiseftirlitinu ber ekki skylda til að upplýsa eigendur húsnæðis um niðurstöður úr eftirliti hjá rekstraraðila í viðkomandi húsnæði. Eigendur húsnæðis eiga að hafa næg úrræði til að afla sér upplýsinga frá matvælafyrirtæki í sínu rými.

Þetta segir Tómas G. Gíslason, framkvæmdastjóri Heilbrigðiseftirlits Reykjavíkur, í samtali við mbl.is, inntur eftir viðbrögðum við gagnrýni Ástu S. Fjeldsted, forstjóra Festi, á upplýsingagjöf frá heilbrigðiseftirlitinu. 

„Við höf­um treyst á eft­ir­lits­stofn­an­ir, líkt og heil­brigðis­eft­ir­litið, til að hafa um­sjón með því að öll­um til­skild­um verk­ferl­um, leyf­um og fyr­ir­komu­lagi á fram­leiðslu og veit­inga­sölu sé fylgt eft­ir í takt við út­gefið starfs­leyfi. Okk­ur blöskraði því að Wok On fengi að halda rekstri áfram eft­ir þessa ein­kunn sem kom um dag­inn og ekki væri lokað þegar í stað,“ sagði Ásta í samtali við Morgunblaðið í gær í kjölfar þess að Krónan sleit leigusamningi sínum við veitingakeðjuna Wok On. 

Frétt af mbl.is

Krónan vildi slíta samstarfi strax

Krónan hefur sama aðgengi og almenningur 

Gagnrýni Ástu snýr að eftirliti sem heilbrigðiseftirlitið sinnti á matsölustöðum Wok On sem meðal annars voru staðsettir í þremur Krónuverslunum. Eftirlitið átti sér stað í nóvember en Ásta kveðst ekki hafa séð skýrslur eftir úttektir eftirlitsins fyrr en í kjölfar aðgerða lögreglu sem áttu sér stað á þriðjudag. 

Aðgerðirnar beindust meðal annars gegn Davíð Viðarsyni, áður Quang Lé, eiganda Wok On. 

„Krónan eins og almenningur hefur upplýsingar á heimasíðu heilbrigðiseftirlitsins. Það er ekki hlutverk heilbrigðiseftirlitsins að upplýsa eigendur húsnæðis um rekstraraðila í viðkomandi húsnæði,“ segir Tómas og bætir við:

„Ekki frekar en að við upplýsum rekstraraðila Kringlunnar um niðurstöður úr eftirliti þar. Eigandi húsnæðis hefur aðrar leiðir til að fylgjast með aðilum sem leigja rými hjá þeim og Krónan á að hafa næg úrræði til að afla sér nauðsynlegra upplýsinga frá matvælafyrirtækjum í sínu rými.“

Fara ekki frá stað sem telst hættulegur neytendum

Aðspurður segir Óskar Ísfeld Sig­urðsson, deild­ar­stjóri mat­væla­eft­ir­lits hjá Heil­brigðis­eft­ir­liti Reykja­vík­ur, það fara eftir eðli skýrslunnar hversu langur tími líður frá því að farið er í eftirlit og þar til skýrslan hefur verið birt á heimasíðu heilbrigðiseftirlitsins. Það fari jafnframt eftir eðli starfseminnar. 

Til útskýringar segir Tómas það taka mislangan tíma að ganga frá hverri skýrslu eftir umfangi fyrirtækisins og skýrslunnar, auk þess sem fyrirtækin fá fjórtán daga andmælarétt samkvæmt lögum til að gera athugasemdir við skýrsluna.  

Þannig að ef það er ljóst að veitingastaður fær falleinkunn þá gæti neytandinn verið að borða þar, eða nota þjónustu, í að minnsta kosti fjórtán daga áður en hann getur leitað eftir upplýsingum um staðinn á vef Heilbrigðiseftirlits Reykjavíkur?

„Nei alls ekki. Við förum ekki frá neinum stað sem við teljum að sé hættulegur fyrir neytandann,“ segir Óskar og Tómas útskýrir að í þeim tilfellum sé brugðist við á staðnum og komið í veg fyrir þá áhættu. 

Ekki útilokað að það verði gerðar breytingar

Spurðir hvort það sé til skoðunar að gera breytingar á upplýsingagjöf til rekstraraðila húsnæðis svarar Óskar því til að almennt sé alltaf verið að leita leiða til að gera vinnu heilbrigðiseftirlitsins gagnsærri með það að markmiði að almenningur sé betur upplýstur. 

Tómas tekur í sama streng en áréttir að hann telji það aðgengi sem fólk hefur í gegnum heimasíðu Heilbrigðiseftirlits Reykjavíkur mjög gott, „en það er ekki útilokað að það verði tekið enn þá lengra“.

Tengdar fréttir

Matvælalager í Sóltúni 20

Alþjóðleg keðja kaupir rekstur Wok On

• Í hart við skiptastjóra
• Wokon mathöll gjaldþrota
• ASÍ segir ummælin tilhæfulaus og ósönn
• Adam tjáir sig ekki: Boðar yfirlýsingu frá ASÍ

» Fleiri tengdar fréttir