„Þetta verður ekki endalaust“
Setja bókamerki
Ármann Höskuldsson eldfjallafræðingur segir vísbendingar benda til þess að umbrotin við Grindavík séu að færa sig í átt að Eldvörpum og gætu náð alla leið að Reykjanestá.
Rannsóknareining Háskóla Íslands í eldfjallafræði og náttúruvá varpaði í gær fram þeirri spá að eldsumbrot á Sundhnúkareininni gætu tekið enda innan tveggja mánaða. Ábyrgðarmenn hópsins eru auk Ármanns, Þorvaldur Þórðarson eldfjallafræðingur, Ingibjörg Jónsdóttir landfræðingur og jarðvísindamaðurinn William M. Moreland.
Veðurstofan áréttaði aftur á móti í gær að engin skýr merki væru um að jarðhræringum á Reykjanesskaga og við Grindavík lyki á næstunni.
Veðurstofan mótmæli ekki spánni
„Þeir eru bara að reyna að horfa lengra fram í tímann,“ segir Ármann í samtali við mbl.is, spurður út í mismunandi spár sérfræðinga.
„Veðurstofan er svo sem ekkert að mótmæla þessu. Þeir tala um að það séu engin merki um að þessu sé að ljúka. Það fer náttúrulega allt eftir því hversu langt fram í tímann þetta er. Ef þú horfir 20 ár fram í tímann er mjög líklegt að þessu ljúki,“ bætir hann við.
„Menn eru bara að rýna í gögnin og reyna að sjá þar út eins vel og hægt er.“
Jarðhræringarnar á leiðinni út í Eldvörp
„Það kemur að því að það hættir að flæða þarna inn. Þetta verður ekki endalaust,“ segir Ármann enn fremur, en hann telur líklegast að umbrotasvæðið færist með tímanum í suðvestur.
„Ég er þeirrar skoðunar að þetta sé á leiðinni út í Eldvörp og þá lýkur þessu á Sundhnúkasprungunni. Það er bara spurning hvenær þetta nær að opna sig úti í Eldvörpum,“ segir hann en forðast að fullyrða um hvenær jarðhræringarnar myndu hafa fært sig í þá átt. Hann svarar þó aðspurður að það gæti gerst fyrir lok árs.
Ármann bendir þá á að merki séu þegar farin að sjást sem benda til þess að umbrotasvæðið sé að færast til Eldvarpa. Ein vísbending er að sprungur við Brimketil séu teknar að gliðna.
„Það er eðli þessa gliðnunarkerfis sem þarna er, það fer frá Sundhnúkum út í Eldvörp og síðan út á Reykjanestá. Það á eftir að gjósa á öllum þessum stöðum. Það er ekki þar með sagt að því sé lokið þessu ferli í gliðnunarkerfinu sem er þarna, þó það sé kannski farið að síga á seinni hlutann við Sundhnúka.“
Einhverjar breytingar orðið í rótum lands
Jarðvísindamenn hafa verið á tánum síðustu tvær vikur, eftir að kvikuinnskot varð á Sundhnúkagígaröðinni laugardaginn 2. mars, og bjuggust margir við því að sjá eldsumbrot stuttu síðar, en svo fór ekki. Síðan þá hefur kvikumagn undir Svartsengi haldið áfram að aukast sem gæti endað með nýju kvikuhlaupi og jafnvel eldgosi.
Ármann segir að það aftur á móti merki um einhverjar breytingar að ekki hefur dregið til tíðinda á þessum tíma.
„Væntanlega eru einhverjar breytingar. Það getur ekki gengið að þetta sé stöðugt skjótandi upp. Þetta þýðir væntanlega að það eru einhverjar breytingar í farvatninu,“ útskýrir eldfjallafræðingurinn. „Eins og að þetta fari út í Eldvörp.“
Nágrannaþjóðir upplýstar en við vöðum í blindni
„Mér finnst gamla Samfylkingin komin aftur“
Beint: Ellefu ráðuneyti í stað tólf
Barn lést í árásinni
Stormur á Þorláksmessu en víðast hvar stefnir í hvít jól
Forstjóri bendir á ábyrgð birgja vegna verðhækkana
Þetta eru ráðherrar ríkisstjórnarinnar