Dregið hefur úr virkni eldgossins sem hófst í gærkvöldi milli Hagafells og Stóra-Skógfells. Virkni er nú á þremur stöðum á gossprungunni. 

Þetta kemur fram í tilkynningu frá Veðurstofu Íslands.

Í tilkynningunni segir að lítil skjálftavirkni hafi mælst á svæðinu það sem af er degi. Mikil strókavirkni hafi verið fram að miðnætti, en virknin dregist hægt saman þegar leið á nóttina.

Nokkuð stöðug virkni hafi verið með deginum, en hún virðist hafa dregist örlítið saman nú síðdegis.

Myndin var tekin á Húsafelli austan við Grindavík í dag þegar sérfræðingar Veðurstofunnar voru að huga að mælitækjum á staðnum. Á myndinni sést staðsetning hraunjaðarsins kl. 13 í dag, þar sem hann rennur meðfram varnargarðinum. Fjarlægð frá Suðurstrandarvegi til sjávar er um 350 m. Ljósmynd/Veðurstofa Íslands.

Fylgjast grannt með framrás hraunsins

Grannt er fylgst með framrás hrauns þar sem möguleiki er á að hraun renni yfir Suðurstrandarveg og jafnvel til sjávar.

Frétt af mbl.is

Hraunið skríður um 20 metra á klukkustund

„Sunnan við Hagafell hefur hraun runnið við hlið varnargarðs og stöðvaðist þar um tíma og myndaði tjörn. Hrauntunga sem rann til vesturs virðist hafa stoppað í um 200 m fjarlægð frá Njarðvíkuræðinni. Grannt er fylgst með framrás hraunsins á þessum slóðum vegna þess möguleika að hraun renni yfir Suðurstrandarveg og jafnvel til sjávar,“ segir í tilkynningunni. 

Þar segir enn fremur að framrás hraunsins í átt að Suðurstrandarvegi hafi þó verið hæg í morgun, um 20 metra á klukkustund. 

Framhaldið ræðst af því hvernig kraftur gossins þróast. Samkvæmt upplýsingum frá vettvangi var hraunjaðarinn í um 250 m fjarlægð frá Suðurstrandarvegi kl. 14.40.

Tengdar fréttir

Eldvirkni á Reykjanesskaga

„Horfum björt fram á veg“

• Hættustigi lýst yfir
• „Mér líður ömurlega“
• Hættan eykst á gosi í Grindavík
• Myndskeið: Rýkur úr sprungu sem klýfur Hagafell

» Fleiri tengdar fréttir

• Blogga um frétt