Innlent | mbl | 17.3.2024 | 9:37 | Uppfært 9:54

Hraun rennur enn í átt að Suðurstrandarvegi

Eldgos á Reykjanesskaga 16. mars 2024. mbl.is/Eyþór

Hraun rennur áfram meðfram varnargörðum í átt að Suðurstrandarvegi að sögn Einars Bessa Gestssonar, náttúruvársérfræðings á Veðurstofu Íslands.

Eldgosið er staðsett á milli Hagafells og Stóra-Skógfells, en sunnan við Hagafell hefur hraun runnið við hlið varnargarðs.

Hefur dregið úr virkni

Það dró verulega úr krafti gossins þegar leið á nóttina og hægðist þá einnig á framrásarhraða hraunsins. Ef virkni heldur áfram getur það gerst að hraunið fari yfir veginn og út í sjó segir Einar.

Hvað gerist ef hraunið rennur út í sjó?

Aðspurður um hvort Veðurstofunni þyki líklegt að sú sviðsmynd muni rætast segir hann erfitt að segja til um það núna.

„Það er verið að safna gögnum á staðnum og meta hegðun þessarar hrauntungu sem er núna að fara í átt að Suðurstrandavegi. Við áttum okkur kannski betur á því eftir því sem við fáum meiri mælingar.“

Ekki er lengur samfelld virkni í sprungunni.

Telja að gosið geti stöðvast í dag

Svipað og síðasta gos

Einar segir gosið haga sér svipað og síðasta gos á Reykjanesskaga.

„Þessi gos hafa byrjað af dálitlum krafti, það eru fyrstu klukkustundirnar þar sem mesti krafturinn er, mestur hraði á hraunflæðinu og útbreiðsla á hrauninu. Svo þegar dregur úr krafti gossins á sprungunni, eins og fór að gerast þegar leið á nóttina, þá samhliða því dregur úr útbreiðslu hraunsins.“

Helstu verkefni Veðurstofunnar næstu klukkustundir snúa að því að meta og fylgjast með hraunflæðinu og sjá mögulega þróun á svæðinu.