Léttir að komast út úr eitruðu umhverfi

Geir Sveinsson, fráfarandi bæjarstjóri í Hveragerði, segir ummæli bæjarfulltrúa minnihlutans í bænum koma lítið á óvart og vera í takt við „þá kjallarapólitík” sem Sjálfstæðisflokkurinn hafi stundað á kjörtímabilinu. Hann segir það létti að komast út „því eitraða umhverfi” sem minnihlutinn hafi skapað.

Frétt af mbl.is

Segir starfslok Geirs hafa legið í loftinu

Ekkert annað en leiðindi

„Ummæli bæjarfulltrúa minnihlutans í Hveragerði í fjölmiðlum í gær koma lítið á óvart enda algjörlega í takt við þá kjallarapólitík sem minnihluti D lista hefur stundað á þessu kjörtímabili; að sparka í starfsfólk bæjarins, afvegaleiða alla umræðu, halda ósannindum fram gagnvart bæjarbúum, brjóta trúnað, axla ekki ábyrgð á sínum fyrri kostnaðarsömu mistökum, vinna gegn hagsmunum bæjarbúa og hafa málefnalega nákvæmlega ekkert fram að færa annað en leiðindi,” segir Geir í tilkynningu í tilefni af ummælum bæjarfulltrúa minnihlutans.

„Með hreinum ólíkindum”

Geir minnist á bréf sem kollegi hans sendi honum í kjölfar ummælanna en þar kemur fram:

„Ég sendi þér þessar línur þar sem ég hef hugsað mikið til þín í dag. Það er með hreinum ólíkindum að lesa ákveðin ummæli í fjölmiðlum eftir starfslok þín. Slík ummæli gefa mér sterka vísbendingu um eitrað umhverfi - og slíkt umhverfi er ekki eftirsóknarvert, og þaðan af síður nærandi fyrir okkur!” segir í bréfinu.

Frétt af mbl.is

Geir hættir sem bæjarstjóri í Hveragerði

Eyði ekki atkvæði sínu á D-listann

Geir segir það greinilega taka á eftir 16 ár við völd að vera ekki lengur við stjórn.

„…eina sem þau geta og kunna er að „bullíast” í fólki með von um að það komi þeim aftur til valda, næst þegar verður kosið. En megi ég ráðleggja bæjarbúum Hveragerðis eitthvað, þá er það að eyða ekki atkvæði sínu á D-listann með þetta fólk um borð, það er einfaldlega ekki þess virði,” segir bæjarstjórinn fráfaraandi og minnist jafnframt á áhyggjur bæjarfulltrúa minnihlutans af kostnaði við starfslok hans, sem séu fullkomlega eðlileg.  

„Sama er ekki hægt að segja um starfslok forvera míns í stóli bæjarstjóra Hveragerðis og hefði bæjarfulltrúanum verið nær að hafa áhyggjur af starfslokum hans 2022 en þau starfslok kostuðu bæinn margfalt meira en mín starfslok munu kosta Hveragerðisbæ, starfslok sem bæjarfulltrúinn sjálfur gerði samning um og samþykkti í bæjarstjórn á sínum tíma,” greinir Geir frá.

Hveragerði. mbl.is/Sigurður Bogi

Aldrei jafnmikið gert

Hann segir mörg aðkallandi verkefni hafa beðið sín og nýs meirihluta þegar hann tók við embættinu og bætir við að aldrei í sögu bæjarins hafi jafnmikið verið gert á jafn skömmum tíma.

Sem dæmi nefnir hann:

• Stækkun grunnskólans í Hveragerði er hafin og verður lokið að mestu um næstu áramót.
• Stækkun leikskólans Óskalands um 4 deildir er farin af stað.
• Við fengum aðgerðar- og metnaðarleysi minnihlutans í fráveitumálum bæjarins sl.10 ár í fangið sem mun m.a. kosta Hveragerðisbúa 50 milljónir í skaðabætur til Veiðifélagsins í Varmá. Ekki gengur að vera með einhvern bútasaum og redda málum fyrir horn heldur þarf að vanda mjög vel til verks hvaða leið á að fara til að leysa þessi mál til framtíðar. Sú vinna er hafin, verkáætlun komin og höfum við núna sett 500 milljónir kr. í verkefnið næstu þrjú ár.
• Samningur um Árhólma voru kláraðir en hann mun skila bænum hundruð milljóna króna á næstu árum. Þessi samningur felur í sér meiriháttar uppbyggingu í dalnum fyrir ofan Hveragerði, m.a. náttúrulaugar og aðstöðu til afþreyingar og útivistar ásamt fjölbreyttum gistimöguleikum.
• Nýtt og endurbætt skipurit bæjarins hefur litið dagsins ljós og frábær stefnumótun bæjarins sem Heilsueflandi samfélag til næstu ára unnin og kynnt
• Heilt fræðslu- og velferðarsvið Hveragerðis var stofnað og komið af stað með 15 öfluga starfsmenn um borð.
• Undirbúningur og hönnun gervigrasvallar er komin af stað og er áætlað að hann verði tekinn í notkun seinnipart þessa árs og stækkun íþróttahússins hefur verið hönnuð og er komin í deiliskipulagsferli.
• Við tókum í gegn og endurskoðuðum samþykktir um stjórn bæjararins og sömuleiðis ný erindisbréf fyrir nefndir bæjarins.
• Ný sorphirða hefur verið innleidd.
• Aðalskipulagsvinna bæjarins er i gangi og stór uppbyggingarverkefni í sveitarfélaginu komin af stað, svo sem hótel- og íbúðauppbygging til að mæta ört stækkandi íbúafjölda.

Eitrað umhverfi

„Hveragerði er yndislegur bær með mikla möguleika og það hafa verið forréttindi að vinna þar með frábæru starfsfólki bæjarins og án þeirra hefði okkur ekki tekist að koma jafn miklu í verk og raun ber vitni,” heldur Geir áfram.

„Ég hefði að sjálfsögðu kosið að klára alla þá vinnu sem hafin var en ég og fulltrúar meirihlutans höfðum ólíka sýn á mitt hlutverk sem bæjarstjóra sem ráðnum framkvæmdastjóra bæjarfélagsins. Þetta skref var því það besta í stöðunni og í raun léttir að komast út úr því eitraða umhverfi sem minnihlutanum hefur tekist að skapa.

Ég óska meirihlutanum og starfsfólki bæjarins áfram alls hins besta og velfarnaðar í komandi verkefnum.”

• Blogga um frétt