Furða sig á „metnaðarleysi ríkisstjórnarinnar“

Bandalag háskólamanna (BHM) og Landssamtök íslenskra stúdenta (LÍS) telja óbreytt styrkjakerfi námsmanna auka ójöfnuð milli ungs fólks og eldri kynslóða sem nutu vaxtaniðurgreiðslna. Þá furða þau sig jafnframt á „metnaðarleysi ríkisstjórnarinnar“ eftir tveggja ára samráð um bætt námslánakerfi.

Þetta kemur fram í tilkynningu.

Samtökin hafa nú sent umsögn í samráðsgátt stjórnvalda vegna fyrirhugaðra breytinga á lögum um námslánakerfið. Kalla þau eftir því að stjórnvöld grípi til frekari aðgerða til að liðka fyrir kjarasamningum.

Í umsögn BHM og LÍS er kallað eftir 25% niðurfellingu á höfuðstól eftir hverja önn og 15% niðurfellingu við námslok. Fara samtökin jafnframt fram á að ábyrgðamannakerfið verði afnumið að fullu. 

Þá kalla samtökin eftir eftirfarandi umbótum í kerfinu til lengri tíma:

1. Blönduðu kerfi námsstyrkja og vaxtaniðurgreiðslu
2. Lækkun á endurgreiðsluhlutfalli G-lána og R-lána.
3. Lækkun vaxtaþaks á lánum og afnámi vaxtaálagsins.
4. Uppgreiðsluafsláttur verði festur í 15% framvegis
5. Auknum heimildum til að afskrifa lán og beita vaxtaniðurgreiðslu til dæmis þegar skortur er í einstaka greinum.

• Blogga um frétt