Bæjarstjórinn bauð upp á mjólk

Grjótkrabbabollur, geitaostur, andaregg, hvítlaukssalat, ábrystur, konfekt og reykt sauðakjöt voru meðal þeirra afurða sem buðust á matarmarkaði sem haldinn var á Akranesi í gær.

Heimaunnir ostar og fleira ágætt var það sem Dalafólkið hafði uppá að bjóða. Á myndinni eru; Guðbjört Lóa Þorgrímsdóttir og Eyjólfur Ingvi Bjarnason í Ásgarði - og Þorgrímur Guðbjartsson á Erpsstöðum. mbl.is/Sigurður Bogi

Þangað mætti matargerðarfólk víða af Vesturlandi með afurðir sínar; kynnti þær og seldi. Mættu margir á markaðinn sem var í gamla HB-húsinu þar sem nú er starfsemi Breiðar – þróunarfélags.

Grjótkrabbabollur gerðu góða lukku. mbl.is/Sigurður Bogi

Meðal þeirra sem á markaðnum voru í gær var Haraldur Benediktsson bæjarstjóri á Akranesi og Lilja Guðrún Eyþórsdóttir kona hans. Þau eru bændur á Vestari-Reyni, skammt frá Akranesi, og mættu beint úr mjöltum á markaðinn. Gáfu þar fólki ógerilsneydda og ófitusprengda mjólk að smakka og voru viðtökur hinar bestu eins og vænta mátti.