Skjálftahrina í Öskju
Setja bókamerki
Skjálftahrinu hefur orðið vart í Öskju í morgun. Stærsti skjálftinn til þessa mældist 3,5 að stærð og reið yfir kl. 10.40.
Átti hann upptök sín í Dyngjufjöllum í norðvesturhluta Öskju.
Þangað má einnig rekja flesta þá skjálfta sem mælst hafa í eldstöðinni í dag, frá því hrinan hófst um klukkan 8 í morgun.
Morgunblaðið greindi frá því í september að svo virtist sem hæg breyting hefði orðið á því landrisi sem áður mældist stöðugt í Öskju. Þetta mátti ráða af mælingum tveggja GPS-stöðva Veðurstofunnar ofan á eldstöðinni.
Klóruðu sér í hausnum
„Það hefur rólega dregið úr risinu á þessum tveimur stöðvum. Þær eru komnar nokkuð nálægt því að nema staðar, en ekki samt alveg – þær eru enn á uppleið,“ sagði Benedikt Gunnar Ófeigsson, sérfræðingur Veðurstofunnar í jarðskorpuhreyfingum, þá í samtali við blaðið.
„En svo er önnur stöð, sem er í miðjunni á þessu öllu saman – við Ólafsgíga, og hún sýnir ekki neina breytingu. Sömuleiðis sést engin skýr breyting á stöðinni í Jónsskarði, sem er líka inni í öskjunni. Að minnsta kosti ekki enn,“ sagði Benedikt.
Sagði hann erfitt að túlka þessar mælingar svo vel væri. Skrýtið væri að svo nálægar stöðvar sýndu jafn ólík merki.
„Við klórum okkur aðeins í hausnum yfir þessu. Af hverju breytingin sést bara á tveimur stöðvum en ekki öllum. Það mun taka svolítinn tíma að sjá hvað þetta þýðir og hvað það er í raun sem á sér stað þarna.“
Hraun fór yfir Grindavíkurveg
Drónamyndskeið frá hápunkti gossins í nótt
„Má segja að þetta gos hafi þjófstartað“
Maskína: Framsókn í fallbaráttu
Börn hafi engan rétt á leikskólakennslu
Virknin dregist saman um 600 metra
Mjög alvarlegt ef Njarðvíkuræð gefur sig