Sviptur ökuréttindum vegna ofsaaksturs

Fimm ökumenn voru sektaðir fyrir of hraðan akstur í umdæmi lögreglunnar í Kópavogi og Breiðholti. Einn þeirra var sviptur ökuréttindum á staðnum en hann ók á 176 km hraða þar sem hámarkshraði er 80 km/klst. Sá á einnig von á hárri sekt.

Tveir handteknir vegna líkamsárásar

Lögreglunni á höfuðborgarsvæðinu var tilkynnt um líkamsárás í hverfi 108 í Reykjavík. Tveir voru handteknir á staðnum og var þeim sleppt að lokinni skýrslutöku. Þeir eru báðir undir lögaldri og er málið því unnið í samráði við forráðamenn og barnavernd.

Teknir vegna innbrots

Tilkynning barst um yfirstandandi innbrot í miðbæ Reykjavíkur. Tveir voru handteknir og var þeim sleppt að lokinni skýrslutökum, að því er segir í dagbók lögreglunnar á höfuðborgarsvæðinu vegna verkefna frá klukkan 17 í gær til kl. 5 í morgun.

mbl.is/Eggert Jóhannesson

Gisti í fangaklefa að eigin ósk

Ölvuðum einstaklingi var vísað á brott af hóteli. Hann hafði ekki í önnur hús að venda og fékk að gista í fangaklefa að eigin ósk.

Tilkynnt var um grunsamlegar mannaferðir í hverfi 104 en enginn fannst.

Þrjár tilkynningar bárust um partíhávaða.

Maður elti barn

Í umdæmi lögreglunnar í Hafnarfirði og Garðabæ var tilkynnt um mann að elta barn. Maðurinn fannst ekki.

Tvær tilkynningar bárust einnig um partíhávaða.

mbl.is/Eggert Jóhannesson

Barn ók stolinni bifreið

Tilkynnt var um barn að aka stolinni bifreið í hverfi 109 í Breiðholti. Málið er unnið í samstarfi við forráðamenn og barnavernd.

Tilkynnt var um sprengingu í hverfi 201 í Kópavogi. Talið er að um flugelda hafi verið að ræða.

Skemmdarverk við Mjóddina

Tvær tilkynningar bárust um unglinga að skemma hluti í og við Mjóddina. Í bæði skiptin voru þeir farnir af vettvangi er lögreglu bar að garði.

Í Grafarvogi var tilkynnt um ölvaða unglinga. Málið er unnið í samstarfi við forráðamenn og barnavernd.

Einnig var tilkynnt um partíhávaða í hverfinu.

• Blogga um frétt