Innlent | mbl | 26.3.2024 | 15:14

Hernaðarandstæðingar fordæma vopnakaupastuðning Íslands

Guttormur Þorsteinsson, formaður Samtaka hernaðarandstæðinga. Mynd úr safni

Samtök hernaðarandstæðinga mótmæla harðlega áformum íslenskra stjórnvalda um að styðja við vopnakaup Tékklands fyrir Úkraínu.

Þetta kemur fram í tilkynningu samtakanna.

„Þá eru stjórnmálamenn líka farnir að leggja til að Íslendingar leggi til hermenn í mögulegan norrænan her. Nú síðast lýsa íslensk stjórnvöld því yfir að þau ætli að fjármagna kaup á vopnum og flutning þeirra til að auka enn á stríðshörmungar í Úkraínu. Þessa þróun og stefnubreytingu er brýnt að stöðva og það strax,“ segir í tilkynningu samtakanna.

Lítið framboð hefur verið af skotfærum og því byrjaði Tékkland, í samstarfi við aðrar þjóðir, að útvega skotfæri fyrir stórskotalið Úkraínu. Ísland leggur 298 milljónir króna til verkefnisins og mun einnig hjálpa við kaup á búnaði fyrir konur í úkraínska hernum.

Frétt af mbl.is

Ísland leggur til 300 milljónir í kaup á skotfærum

Segja mikilvægt að Ísland stofni aldrei her

Samtökin minna á að Ísland sé herlaus þjóð og segja mikilvægt að Íslendingar stofni aldrei her. Telja samtökin að án hers séu eru Íslendingar í kjöraðstöðu til að standa við stefnu um frið án hernaðar og að vera málsvarar friðsamlegra leiða til að leysa ágreining víða um heim.

„Lengst af á þeim 75 árum sem eru frá því að Alþingi samþykkti aðild Íslands að hernaðarbandalaginu NATO, tók Ísland ekki þátt í herráði NATO og lagði því hvorki til hermenn né drápstól.

Á seinni árum hafa vígfúsir stjórnmálamenn hins vegar bætt æ meir í þátttöku Íslands í vígbúnaði og hernaðarátökum. Gróft dæmi þess var þegar íslenskir ráðherrar settu Ísland á lista yfir þjóðir sem væru viljugar til að heyja stríð í Írak,“ segir í tilkynningunni.

Frétt af mbl.is

Skoða mögulega þátttöku Íslands í her

Eina lausnin vopnahlé

Ítreka samtökin að þau fordæmi innrás Rússlands í Úkraínu.

„Hver dagur sem stríðið mun standa áfram, mun verða framhald á sömu hörmungum. Þúsundir ungra karlmanna hafa dáið og örkumlast í þessu stríði og nú er verið að sækja ungar konur til að falla í þessum vonlausu skotgröfum líka. Þessu galna stríði lýkur ekki með „sigri“ á vígvöllum, áframhaldandi stríð í Úkraínu mun bara versna.“

Samtök hernaðarandstæðinga segja að eina lausnin í þessu stríði sé að komið verði á tafarlausu vopnahléi og friðarviðræðum í kjölfarið.

„Það er skylda okkar Íslendinga að standa föstum fótum sem herlaus þjóð og beita okkur fyrir friðsamlegri lausn á stríðinu í Úkraínu,“ segir að lokum í tilkynningunni.