Allir fimmtíu Passíusálmar Hallgríms Péturssonar verða lesnir upp í Seltjarnarneskirkju á morgun, föstudaginn langa, frá klukkan 13 til 18. Er þetta í 16. skiptið í röð sem sálmarnir eru lesnir í kirkjunni.
Kirkjan mun standa öllum opin og er áheyrendum frjálst að dvelja þar eins lengi og aðstæður hvers og eins leyfa.
Lesarar verða á þriðja tug karla og kvenna úr söfnuðinum.
Í lestrarhléum mun Guðný Guðmundsdóttir, fyrrverandi konsertmeistari Sinfóníuhljómsveitar Íslands, leika Chaconne úr partítu í d-moll fyrir einleiksfiðlu eftir Johann Sebastian Bach. Tónverkið í heild er 15-17 mínútur sem Guðný mun skipta upp í hæfilega kafla.
Kaffi verður á boðstólum í safnaðarheimili kirkjunnar.
Meira í Morgunblaðinu í dag, fimmtudag.