Fjölmargir sem ekki komast ferða sinna

Hringvegurinn er víða lokaður á norðan og norðaustanverðu landinu vegna ófærðar, auk þess er ófært um Steingrímsfjarðarheiði og Þröskulda. 

Það var um eitt leytið í dag sem Öxnadalsheiðinni var lokað að sögn Magnúsar Inga Jónssonar, þjónustufulltrúa í umferðaþjónustu hjá Vegagerðinn. Unnið er að því að opna veginn um heiðina á ný en óvíst um hvað verður. 

Vegna lokunar um Öxnadalsheiðina hefur verið nokkur umferð fyrir Tröllaskaga en Magnús Ingi segir ekki mælt með því að fara þá leið, að þessu sinni, í stað þess að bíða eftir að komast um Öxnadalsheiðina. 

„Þar eru bílar búnir að vera að lenda í vandræðum og umferð gengur hægt,“ segir Magnús Ingi, en snjóþekja er á veginum og skafrenningur. 

Uppfært 16:46:

Búið er að opna Öxnadalsheiðina en á umferdin.is segir að þæfingur sé á heiðinni og aðstæður mjög leiðinlegar, mikil snjókoma, skafrenningur og lítið skyggni. „Aðstæður geta breyst hratt til hins verra. Við hverjum fólk því til að skoða síðuna reglulega.“

Strákar á leið úr útkalli 

Magnús Magnússon, formaður björgunarsveitarinnar Stráka á Siglufirði, segir björgunarsveitina á leið úr útkalli frá Siglufjarðarvegi þar sem húsbílar sátu fastir. Þá segir hann gríðarlega hálku á svæðinu og því hafi framdrifsbílar verið að lenda í miklum vandræðum. 

Hann segir veðrið á svæðinu þó vera að ganga niður í bili en bætir við að útlit sé fyrir að það muni aftur versna í kvöld og á morgun. „Við erum bara klárir,“ segir Magnús. 

Næstu upplýsinga að vænta á mánudagsmorgun

Hringvegurinn er þó ekki einungis lokaður um Öxnadalsheiði því jafnframt er lokað um Möðrudalsöræfi. Magnús Ingi segir töluvert af bílum hafa fest sig á Möðrudalsöræfum í nótt og ekki stefnt að því að moka veginn fyrr en á mánudagsmorgun.

„Þar er lokað og næstu upplýsinga að vænta á mánudagsmorgun,“ segir Magnús Ingi og bætir við að útlit sé fyrir leiðinda veðri á svæðinu næsta sólarhringinn. 

Frétt af mbl.is

Á annan tug bíla sátu fastir á Austurlandi

Margir í von um að komast á Ísafjörð

Sé horft fram hjá hringveginum og vestur á landið má sjá að jafnframt er ófært um Steingrímsfjarðarheiði og Þröskulda. Magnús Ingi segir marga hafa haft samband við Vegagerðina í von um að komast þar í gegn, en ekki sé útlit fyrir að vegirnir verði opnaðir í dag. 

Það skal engan undra að fjöldi manns sækist eftir því að komast um Steingrímsfjarðarheiði og Þröskulda í dag því mikið er um að vera  á Ísaf­irði yfir pásk­ana. Rokk­hátíð alþýðunn­ar, Aldrei fór ég suður, hófst í gær og stemmingin verður ekki síðri í dag en þá koma fram Spacestati­on, Birn­ir, Hips­um­haps, Helgi Björns­son, Of Mon­sters and Men, HAM og Inspector Spacetime.

Frétt af mbl.is

Stuð og stemning á Ísafirði

• Blogga um frétt