Tjón vegna þjófnaðar í verslunum á Íslandi, sem tengist alþjóðlegri skipulagðri glæpastarfsemi, hleypur á 6-8 milljörðum króna á ári. Á næstunni verður kynnt til leiks aukið samstarf verslana og lögreglunnar til að brjóta þennan þjófnað á bak aftur.
Þetta segir Andrés Magnússon, framkvæmdastjóri Samtaka verslunar og þjónustu (SVÞ), í samtali við Morgunblaðið í dag, laugardag.
„Þetta er vandamál í öllum verslunum á Íslandi,“ segir Andrés.
Hann segir að SVÞ hafi unnið í mörg ár með lögreglunni í leit að leiðum til að bæta samskipti verslana og lögreglunnar. Nú sé í höfn nýtt kerfi sem ætti að bæta viðbragðstíma lögreglunnar.
„Langstærsti hluti þess tjóns sem verður með þessum hætti er unninn af fólki sem kemur hingað og er hérna í takmarkaðan tíma.
Allt of oft – að því er virðist – er það sent hingað í þessum tilgangi og þegar það hefur verið handtekið tvisvar eða þrisvar þá hverfur það á braut og nýir eru sendir í staðinn,“ segir hann.
Viðtalið í heild sinni má lesa í Morgunblaðinu í dag, laugardag.