Innlent | mbl | 11.4.2024 | 20:37

100 km jarðgöng leysa ekki vandann

Davíð Þorláksson er framkvæmdastjóri Betri samgangna ohf. mbl.is/Kristinn Magnússon

Davíð Þorláksson, framkvæmdastjóri hjá Betri samgöngum ohf., segir að tillögur Holbergs Mássonar, formanns Sjálfstæðisfélags Miðborgar og Norðurmýrar, um jarðgangakerfi á höfuðborgarsvæðinu og á landsbyggðinni vera ágætt innlegg í umræðuna. Hann sjái þó vankanta á hugmyndinni við fyrstu sýn.

„Það eru margir fyrsta flokks sérfræðingar hjá okkur, Vegagerðinni, sveitarfélögunum og á verkfræðistofunum. Við skoðum allar tillögur sem koma fram hjá sérfræðingum sem og hvað er að gerast úti í heimi,“ segir Davíð.

Í tillögu Holgeirs sem birtist í grein í Morgunblaðinu í dag er rætt um að hraða megi gangagerð þannig að gerð verði jarðgöng sem eru 100 kílómetrar á höfuðborgarsvæðinu og 150 kílómetrar á landsbyggðinni. Verkefnin mætti klára á 20 árum í stað þess að vera til 85 ára líkt og núverandi áætlanir gera ráð fyrir. Áætlar hann kostnaðinn um 800 milljarða króna.

Frétt af mbl.is

Leggja til 100 km jarðgöng á höfuðborgarsvæðinu

Plássfrekir gangamunnar

Davíð segir að án þess að hafa kynnt sér hugmyndina í þaula sjái hann tvennt sem staldra þurfi við í tengslum við hana.

„Meðalferð á höfuðborgarsvæðinu er um þriggja kílómetra bílferð. Löng göng þvert um höfuðborgarsvæðið eru því ekki að fara að leysa flestar ferðir,“ segir Davíð.

Eins útheimti gangamunnar mikið pláss í borgarlandinu og ætla mætti að 100 kílómetra jarðgöng á höfuðborgarsvæðinu myndu krefjast fjölda gangamunna. Þá bendir hann einnig á að þeir séu dýrir í framkvæmd.

Eru að skoða göng á Miklubraut og í Hafnarfirði

„Í þessu samhengi má nefna að við erum að skoða göng á Miklubraut í stað stokks og líka undir Setbergshamarinn við Reykjanesbraut í Hafnarfirði. Við erum því ekki fráhuga jarðgöngum í þeim aðstæðum sem þau henta. En þar er þá fyrst og fremst verið að skoða stutt göng til að leysa staðbundinn vanda,“ segir Davíð.