Góð veðurspá fyrir morgundaginn: Hlýnar í næstu viku

Það stefnir í að það viðri betur á landsmenn um þessa helgi heldur en tvær síðustu og gangi veðurspáin eftir verður gott veður víðs vegar um landið á morgun.

Haraldur Eiríksson, veðurfræðingur á Veðurstofu Íslands, segir að áfram verði frekar kalt í veðri. Hann segir að morgundagurinn líti nokkuð vel út á landinu.

Léttir víða til á morgun

„Það er útlit fyrir að það létti víða til á morgun en eitthvað verður um él á Suðausturlandi. Það verður frekar kalt og frost um mest allt land en hitinn gæti skriðið aðeins yfir frostmarkið sunnan landsins yfir daginn,“ segir Haraldur við mbl.is. 

Hann segir að á sunnudaginn taki austlæg átt við og að lægð fyrir sunnan land komi inn á landið með einhverja úrkomu í formi sjókomu og slyddu víða um land en að Norðurlandið ætti að sleppa og syðst verður væntanlega nógu hlýtt að úrkoman fari yfir í rigningu.

Kannski fer vorið að sýna sig

„Ólíkt síðustu tveimur helgum stefnir í að besta veðrið verði á Norðurlandi á sunnudaginn og góðar líkur að það sjáist til sólar þar,“ segir Haraldur.

Talsverð gjóla verði á landinu en ekkert hvassviðri.

Spurður hvort hann sjái einhver hlýindi í kortunum segir Haraldur:

„Á mánudaginn fer hann aftur í norðanátt og kulda en spárnar gera ráð fyrir að það fari að hlýna um og eftir miðja næstu viku. Kannski vorið fari þá eitthvað að sýna sig.“

Veðurvefur mbl.is

• Blogga um frétt