Á sjöunda tug plantna voru rifnar upp úr beðum á Eiðistorgi í gær. Ekki er vitað hver ber ábyrgð á skemmdarverkinu en bæjarstjóri Seltjarnarnesbæjar tók málin í eigin hendur og gróðursetti þær aftur í morgun.
„Djöfulsins dónaskapur var þetta - algjörlega óþarft. 65 glænýjar plöntur sem við vorum nýbúin að planta,“ segir Þór Sigurgeirsson, bæjarstjóri Seltjarnarness, í samtali við mbl.is.
Skemmdarverkið var framið seinnipartinn í gær og kveðst Þór telja mögulegt að um prakkarastrik ungs fólks sé að ræða.
„En þetta er bara glatað. Við erum nýbúin að gera upp torgið fyrir fullt af peningum og gera það rosa flott,“ segir Þór.
Eins og fyrr segir þá var það Þór sem gekk í verkið við að gróðursetja plönturnar á ný. Hann vonast nú til þess að plönturnar lifi þetta af en hann vökvaði þær einnig.
„Þetta er bara akút mál og ég vil bjarga verðmætum,“ segir hann.
Bendir hann á að plönturnar hafi verið gróðursettar fyrir opinbera heimsókn forseta Íslands í tilefni af 50 ára afmæli bæjarins. Málið hefur verið tilkynnt lögreglu og farið verður yfir fyrirliggjandi myndefni.
„Við þurfum að koma í veg fyrir þetta. Allir Seltirningar, hver og einn, er á vakt að passa þetta – ekki bara ég.“