Vorum kannski ekki bara „hrópandi í eyðimörkinni“
Setja bókamerki
Guðmundur Gunnarsson, fyrrverandi frambjóðandi Viðreisnar í Norðvesturkjördæmi, segir mikinn létti að hafa loks fengið niðurstöðu í máli sínu gegn íslenska ríkinu fyrir Mannréttindadómstóli Evrópu.
Hann segir málið fyrst og fremst hafa snúist um „prinsippið“ – að ekki væri hægt að láta það óátalið hvernig framkvæmd kosninganna hefði verið háttað.
„Það er ágætt að fá loksins niðurstöðu, kannski vorum við ekki bara hrópandi í eyðimörkinni að halda því fram að það hefði ekki staðið steinn yfir steini í framkvæmd þessara kosninga og hvernig var greitt úr því,“ segir Guðmundur.
Braut gegn rétti borgara til frjálsra kosninga
Dómur féll í máli Guðmundar og Magnúsar Davíðs Norðdahl, sem báðir voru frambjóðendur í Norðvesturkjördæmi í síðustu alþingiskosningum, í Mannréttindadómstóli Evrópu í morgun.
Var íslenska ríkið dæmt brotlegt gegn rétti borgara til frjálsra kosninga sem og gegn meginreglu um skilvirk réttarúrræði í kosningunum til Alþingis árið 2021.
Málið á rætur sínar í alþingiskosningum árið 2021. Ágallar voru á talningu atkvæða í Norðvesturkjördæmi og eins og frægt er féllu nokkrir af þingi eftir að atkvæði voru talin aftur, Guðmundur þar á meðal.
Seinni talning atkvæða var látin standa eftir að meirihluti þingmanna greiddi atkvæði því í vil.
Að mati Mannréttindadómstólsins gátu þingmenn ekki verið „pólitískt hlutlausir“ í ákvörðunartöku um kosninguna.
Enn að lesa í gegnum dóminn
Spurður hvort hann íhugi skaðabótakröfu segist Guðmundur hreinlega ekki vera kominn svo langt. Var hann enn að lesa í gegnum dóminn þegar blaðamaður sló á þráðinn.
Hann kveðst þó vona að viðbrögð ríkisins við dómnum verði ekki „af sömu léttúð“ og þegar málið kom fyrst upp.
„Þetta er sigur fyrir okkur öll, þarna er brotið á okkar rétti til frjálsra kosninga. Það er risastórt. Þarna er verið að draga fram í dagsljósið þessa alvarlegu ágalla á lýðræðiskerfinu okkar – að þingmenn séu í þeirri stöðu að taka afstöðu til þess hvort þeir séu réttkjörnir eða ekki, burtséð frá ágöllum í framkvæmd sem öllum voru ljósir,“ segir Guðmundur og heldur áfram:
„Ég held að þeir sem með valdið fara – ef þeir eru ekki aðeins hugsi yfir því eftir svona áfellisdóm, þá held ég að það hljóti að teljast svolítið skrítið.“
Víkingar komnir yfir 800 milljónir í greiðslur
Forstjóri bendir á ábyrgð birgja vegna verðhækkana
„Börn heima sem maður myndi vilja hafa í skjóli“
Skattamál verði líklega „þeirra mesta klemma“
Þetta eru ráðherrar ríkisstjórnarinnar
Alvarleg netárás á Wise
