Líkti forsetaframbjóðendum við Guðna Ágústsson
Setja bókamerki
Lilja Dögg Alfreðsdóttir, menningar- og viðskiptaráðherra og varaformaður Framsóknarflokksins, gerði á flokksþingi Framsóknar góðlátlegt grín að frambjóðendum til embættis forseta Íslands.
Hún sagði meira og minna alla frambjóðendurnar vera komna í lopapeysu að láta taka myndir af sér brosandi úti á landi með hund eða lamb sér við hlið.
„Það má eiginlega segja að við séum að horfa upp á lítinn Guðna Ágústsson [fyrrverandi landbúnaðarráðherra]í hverjum einasta frambjóðanda,” sagði hún og uppskar mikinn hlátur í salnum.
Gagnrýndi Samfylkinguna
Líkt og Sigurður Ingi Jóhannsson, formaður Framsóknarflokksins, sem steig í pontu á undan henni gagnrýndi Lilja Dögg Samfylkinguna og sagði hana nánast hafa gengið inn í Framsóknarflokkinn með stefnumálum sínum.
Nefndi hún andstöðu við inngöngu í Evrópusambandið, nýtingu fleiri virkjanakosta og raunsæjar breytingar á málefnum útlendinga sem dæmi.
Hún sagði Samfylkinguna hafa tekið hverja U-beygjuna á fætur annarri í málflutningi sínum og að flokkurinn væri í raun og veru að keppast að því að gera stefnu Framsóknarflokksins að eigin stefnu.
Hún sagði að ef Samfylkingin yrði leiðandi hér á landi yrði aðild að ESB komin á dagskrá íslenskra stjórnvalda með tilheyrandi sjálfstæðisfórn. Þetta yrði Framsóknarfólk að koma í veg fyrir.
„Þjóðinni hefur alltaf vegnað best þegar við höfum efnahagslegt sjálfstæði. Það má ekki vera þannig að við sofnum eitthvað á þeirri vakt. Ég get lofað ykkur því að þá fer að fjara undan þessum góðu lífsgæðum sem við höfum hér á Íslandi í dag,” sagði Lilja Dögg.
„Ekki einn dropi einkavæddur“
Hún minntist á að græn raforkuframleiðsla hefði verið einn helsti burðarás lífskjarasóknar í landinu.
„Ég ætla ekki að neita því að sú kyrrstaða sem hefur verið í raforkuvinnslu hér á landi hún veldur auðvitað gríðarlegum áhyggjum,” sagði hún. Fara þurfi frá rauðu ljósi yfir á grænt ljós í orkumálunum.
Lilja Dögg talaði um mikilvægi Landsvirkjunar og nefndi að fyrirtækið hefði skilað 55 milljörðum í arðgreiðslur í ríkissjóð að undanförnu.
„Það verður ekki einn dropi einkavæddur hjá Landsvirkjun á okkar vakt,” sagði hún og uppskar við það lófaklapp.
Lilja Dögg sagðist í lok ræðu sinnar vilja gegna stöðu varaformanns Framsóknarflokksins áfram.
Hraunið við bílastæði Bláa lónsins
Virknin dregist saman um 600 metra
/frimg/1/53/7/1530787.jpg)
Flogið á milli ljósaskipta
Maskína: Framsókn í fallbaráttu
„Má segja að þetta gos hafi þjófstartað“
Hraunið náð Njarðvíkuræð: Fylgjast með raflínu
Litlar líkur á að hraunið nái til mannvirkja