46% Íslendinga finnst í lagi að kaupa eftirlíkingar

Íslendingar kaupa síður falsaðar vörur samanborið við aðra Evrópubúa. Engu að síður finnst tæplega helmingi þjóðarinnar, eða 46%, stundum í lagi að festa kaup á falsaðri vöru eða eftirlíkingu.

Þetta eru niðurstöður könnunar sem Maskína gerði fyrir Hugverkastofu fyrr í mánuðinum.

Þar kom fram að um 9% Íslendinga hefðu keypt falsanir eða eftirlíkingar á undanförnum 12 mánuðum, mest á erlendum vefsíðum. Langflest nefna lægra verð sem helstu ástæðu þess að hafa keypt falsaða vöru. Var fólk á aldrinum 18 til 29 ára líklegra til að hafa keypt falsaðar vörur eða eftirlíkingar síðasta árið. 

13% Evrópubúa keypt falsaðar vörur viljandi

Lítill munur var á svörum kynjanna um hvort þau hefðu keypt falsaðar vörur eður ei. Aftur á móti var munur á þeim vörum sem fest voru kaup á. Þannig keyptu konur helst gleraugu eða sólgleraugu og skartgripi, á meðan karlar keyptu frekar merkjavöruföt og íþróttaföt.

Samkvæmt könnun á vegum Hugverkastofu Evrópusambandsins sem gerð var í fyrra hafa 13% Evrópubúa vísvitandi keypt falsaðar vörur síðasta árið. Þá telur þriðjungur þeirra í lagi að kaupa falsaðar vörur, ef ekta vörur eru of dýrar.

Barnaþrælkun og mansal

Hugverkastofan, Epal og React - alþjóðlegt samstarfsnet fyrirtækja gegn fölsunum, bjóða til sýningar á Hönnunarmars dagana 23.-27. apríl, í verslunum Epal í Skeifunni og á Laugavegi, í tilefni af Alþjóðahugverkadeginum 26. apríl. Markmiðið er að vekja athygli á því af hverju við ættum að velja ekta vörur, virða hugverkaréttindi og forðast að kaupa eftirlíkingar

„Það eru margar ástæður fyrir því að fólk ætti frekar að velja ekta vörur en eftirlíkingar og falsanir. Í fyrsta lagi eru eftirlíkingar auðvitað oft af miklu lélegri gæðum. Í sumum tilfellum þýðir það fyrst og fremst verra útlit og lélegri endingu en í sumum tilfellum geta lélegri gæði hreinlega orðið til þess að vara getur valdið skaða,“ er haft eftir Borghildi Erlingsdóttur, forstjóra Hugverkastofunnar, í tilkynningu.

„Það má t.d. nefna fölsuð lyf, snyrtivörur, varahluti í bifreiðar og flugvélar og jafnvel hluti eins og sólgleraugu og fatnað. Svo veit maður náttúrulega ekkert um þær aðstæður sem falsaðar vörur eru framleiddar við en mikið af þeim falsaða varningi sem er til sölu á netinu og annars staðar er framleiddur af skipulögðum glæpasamtökum sem einnig stunda fíkniefnasölu, barnaþrælkun og mansal. Svo er að sjálfsögðu mikilvægt að bera virðingu fyrir þeim sem eiga hugverkin og hafa lagt hugvit, tíma, metnað og fjármagn í að þróa þau. Neytendur vita hins vegar hvaðan ekta varan kemur, hvernig hún er unnin og jafnan má gera ráð fyrir því að ábyrgð fylgi á gæðum og öryggi vörunnar frá framleiðanda.“

• Blogga um frétt