Innlent | Morgunblaðið | 11.5.2024 | 10:30

Jón Gnarr man hvað hann kaus í Icesave

Jón Gnarr, leikari og forsetaframbjóðandi, viðurkennir að hann hafi haft rangt fyrir sér í Icesave-málinu á sínum tíma, en hann kaus með samningunum þegar þeim var vísað til þjóðaratkvæðagreiðslu.

Jón er nýjasti gestur Spursmála og ræðir þar sína sýn á forsetaembættið, meðal annars hvernig hann myndi beita hinum svonefnda málskotsrétti forsetans.

Í máli Jóns kom fram að hann myndi beita réttinum ef stór hluti þjóðarinnar væri andvígur máli sem þingið hefði samþykkt, og nefndi hann m.a. ef viss fjöldi undirskrifta hefði safnast gegn tilteknu máli. Þá myndi hann beita réttinum ef um væri að ræða mál sem hann sjálfur teldi röng, líkt og ef þingið myndi banna fóstureyðingar alfarið eða leiða dauðarefsingu í lög.

En ef það væru 40 þúsund?

Þá segir hann að 50 þúsund undirskriftir sem aflað væri gegn tilteknu lagafrumvarpi, sem safnað væri í gegnum Ísland.is, myndu nægja til þess að hann myndi vísa slíku máli til þjóðarinnar. Ekki er hann eins viss ef fjöldinn væri 40 þúsund.

Jón Gnarr er nýjasti gestur Spursmála. mbl.is/Eyþór Árnason

Var viss í sinni sök

Inntur um afstöðu sína til Icesave-málsins sagðist Jón á þeim tíma hafa verið handviss um að það rétta í stöðunni væri að samþykkja samningana sem þá lágu fyrir, en að hann hefði haft rangt fyrir sér þar.

Frétt af mbl.is

Var ekki að hæðast að fórnarlömbum nauðgana

Sagðist Jón geta fullyrt að hann hefði þrátt fyrir það vísað málinu til þjóðarinnar vegna undirskriftasöfnunar InDefence-hópsins.

Minnisleysi Baldurs

Athygli vakti fyrir nokkru þegar Baldur Þórhallsson, mótframbjóðandi Jóns upplýsti áhorfendur Spursmála um að hann myndi ekki hvernig hann kaus í Icesave-atkvæðagreiðslunni á sínum tíma. Baldur var virkur þátttakandi í umræðunni um samningana sem prófessor í stjórnmálafræði við Háskóla Íslands og varaþingmaður Samfylkingarinnar á þeim tíma.