Myndir: Ný miðstöð menningar og vísinda opnuð

Í tilefni opnunar á nýrri miðstöð menningar og vísinda í Bókasafni Kópavogs og Náttúrufræðistofu Kópavogs var efnt til hátíðarhalda í dag. 

Opnunarhátíðin hófst kl. 13 með tónum Lúðrasveitar verkalýðsins. Gestir og gangandi gátu tekið þátt í lista- og vísindasmiðjum úti og inni.

Meiri samnýting

Í tilkynningu frá Kópavogsbæ segir að eitt helsta aðdráttarafl rýmisins sé ný grunnsýning Náttúrufræðistofu Kópavogs, Brot úr ævi jarðar, sem var opnuð af þessu tilefni. Þá hefur barnabókasafnið verið hannað með náttúruna umleikis safnið í huga.

„Fyrir ári síðan boðuðum við nýja nálgun í menningarstarfi okkar og einn liður í því var að leggja aukna áherslu á að efla fræðslu og upplifun barna í menningarhúsum okkar. Við gerum börnum hátt undir höfði í þessu glæsilega rými þar sem gefst tækifæri til sköpunar, leiks og næðis. Tengingin sem myndast á milli Náttúrufræðistofu og Bókasafnsins er öðruvísi, spennandi og áður óþekkt framsetning á Íslandi sem ég er fullviss um að Kópavogsbúar og aðrir gestir kunna vel að meta,“ er haft eftir Ásdísi Kristjánsdóttur bæjarstjóra í tilkynningu.