Umræðan á villigötum: Flýtimeðferð leysi ekki vandann

Umræðan um lokun apóteka er á villigötum, að mati Lyfjafræðingafélagsins. Nýútskrifaðir lyfjafræðingar fá líklega ekki starfsleyfi útgefin fyrr en í júlí en skyndilausn eins og flýtimeðferð starfsleyfa leysi ekki mönnunarvanda í apótekum landsins.

Útlit er fyrir að nýút­skrifaðir lyfjafræðingar fái ekki útgefin starfsleyfi fyrr en í júlí. Andrés Magnússon, framkvæmdastjóri Samtaka verslunar og þjónustu, lýsti áhyggjum sínum af því og hélt því fram í viðtali við Morgunblaðið að það gæti leitt til þess að loka þurfi sumum apótekum vegna mönnunarvanda.

Það er ekki rétt, að mati Lyfjafræðingafélags Íslands (LFÍ). „Að fullyrða að seinkun á veitingu starfsleyfa um mánuð valdi lokun apóteka á landsbyggðinni er aftur á móti umræða sem er á villigötum,“ segir í yfirlýsingu félagsins, sem tekur aftur á móti undir þau sjónarmið að veiting starfsleyfa mætti ganga hraðar fyrir sig.

Frétt af mbl.is

Segir útlit fyrir lokun apóteka

Starfsumhverfið erfitt

Á Íslandi er fjöldi apóteka miðað við höfðatölu með hæsta móti miðað við nágrannalönd okkar, segir LFÍ. Apótek landsins eru 74 talsins, 49 á höfuðborgarsvæðinu og 25 á landsbyggðinni. Á Íslandi eru 639 lyfjafræðingar undir 67 ára með starfsleyfi og stefnir í að þeim fjölgi um 25 eftir útskrift í sumar.

„Framboð lyfjafræðinga ætti því að teljast feikinóg fyrir apóteksfjölda landsins. En rétt eins og fjöldi apóteka fylgir lögmálum markaðarins er þörf fyrir lyfjafræðinga víðar í samfélaginu og því velur stór hluti þeirra sér annan starfsvettvang,“ skrifar félagið.

LFÍ segir að lyfjafræðingum í apótekum sé þunnt smurt yfir landið, sem bitni á starfsumhverfi þeirra. Og þegar starfsumhverfið versnar verða önnur störf eftirsóknarverðari í augum lyfjafræðinga.

„Til ráða er annaðhvort að fækka apótekum eða fjölga lyfjafræðingum. Þriðji möguleikinn væri að bæta kjör lyfjafræðinga í apótekum. Það myndi laða að fleiri lyfjafræðinga til starfa og samtímis auka rekstrarkostnað sem alla jafna ætti að leiða til fækkunar apóteka.“

Sigurbjörg Sæunn Guðmundsdóttir formaður LFÍ. Ljósmynd/Lyfjafræðingafélag Íslands

Með lengri vinnuskyldum

Lyfjafræðingar í apótekum hafa einna lengstu vinnuskyldu hér á landi samkvæmt kjarasamningum, að sögn LFÍ.

„Í mörgum apótekum er aðeins einn lyfjafræðingur sem stendur vaktina og kemst oft á tíðum hvorki í mat né kaffi. Lögum samkvæmt skulu apótek vera opin a.m.k. milli 9 og 18,“ segir í tilkynningunni þar sem einnig er bent á að sum apótek séu opin um helgar, kvöld og jafnvel á næturnar.

Þá mætti betur nýta sértæka þekkingu lyfjafræðinga. Lyfjafræðingar erlendis sinni víðtækara hlutverki í heilbrigðiskerfinu en hér á landi.

„Af ofangreindu má leiða að flýtimeðferð á veitingu starfsleyfa fyrir nýútskrifaðra lyfjafræðinga leysir ekki vandann við að manna apótek landsins. Það sé skyndilausn á dýpra vandamáli. Hið raunverulega samtal þarf að snúast um halda lyfjafræðingum í starfi með því að gera betur við stéttina. Aðeins með því að takast á við þessar grundvallar áskoranir getum við sannarlega tryggt bætta lyfjaþjónustu sem væri viðskiptavinum, lyfjafræðingum og heilbrigðiskerfinu til hagsbóta.“

• Blogga um frétt