Þolandi alvarlegs ofbeldisbrots í Reykholti í lok apríl er Palestínumaður, að sögn Ríkisútvarpsins, sem bendir einnig á að gerendur tengist fjölskylduböndum.
Fjórir Íslendingar, þrír karlmenn og ein kona, munu að óbreyttu sæta gæsluvarðhald til 24. maí vegna meintrar frelsissviptingar, líkamsárásar og fjárkúgunar í heimahúsi í Reykholti, eins og mbl.is greindi frá í morgun.
Samkvæmt upplýsingum frá lögreglunni er þolandinn erlendur ríkisborgari sem hefur verið hér á landi í langan tíma.
Yfirlögregluþjónn á Suðurlandi vildi ekki tjá sig um rannsóknina þegar mbl.is hafði samband. RÚV hefur eftir heimildum sínum að þolandinn sé Palestínumaður búsettur í Reykholti sem leigði bílskúrsíbúð af einum gerendanna, þar sem brotin áttu sér stað.
Þá tengist gerendurnir einnig fjölskylduböndum. Tvö þeirra grunuðu séu á þrítugsaldri, einn á sjötugsaldri og sá yngsti undir tvítugu.
RÚV segir sínar heimildir herma að fólkið hafi haldið einstaklingnum í kjallara hússins í nokkra daga. Síðan hafi þau þau keyrt með hann upp á Keflavíkurflugvöll til að senda hann úr landi. Ekki er vitað hvert hann var sendur.
Lögreglan á Suðurlandi nýtur aðstoðar lögreglunnar á höfuðborgarsvæðinu, embættis ríkislögreglustjóra og embættis héraðssaksóknara.