Hermann Nökkvi Gunnarsson
Kjartan Björnsson, rakarameistari og forseti bæjarstjórnar Árborgar, og Aldís Hafsteinsdóttir, sveitarstjóri Hrunamannahrepps, verða sérstakir álitsgjafar á forsetafundi Morgunblaðsins og mbl.is á morgun.
Forsetafundurinn verður að þessu sinni haldinn með Baldri Þórhallssyni forsetaframbjóðanda á Hótel Selfossi á þriðjudagskvöldi klukkan 19.30.
Kjartan og Aldís munu svara spurningum um forsetakosningarnar og gefa sitt álit á stöðu mála. Núna eru aðeins rúmlega tvær vikur til kosninga og munu þau spá í spilin fyrir fundargesti og áhorfendur.
Blaðamennirnir Andrés Magnússon og Stefán Einar Stefánsson munu ræða við Baldur um framboð hans til embættis forseta Íslands og auk þess munu fundargestir fá tækifæri til þess að að spyrja Baldur spurninga.
Allir Selfyssingar og nærsveitungar eru velkomnir á meðan húsrúm leyfir en þegar er búið að halda forsetafundi á Ísafirði og á Egilsstöðum og voru þeir gríðarlega vel sóttir.