Brunavarnir Suðurnesja fást nú við sinubruna sem kviknaði skammt frá Vogum við Vatnsleysuströnd.
Þetta staðfestir Gunnar Jón Ólafsson, verkefnastjóri hjá Brunavörnum Suðurnesja, í samtali við mbl.is.
Hann segir fyrstu tilkynningu hafa borist fyrir rúmu korteri og síðan þá hafi nokkrir tilkynnt brunann enda er hann skammt frá Reykjanesbrautinni.
Að sögn Gunnars er sinubruninn rétt við fiskeldið í Vogum. Var einn dælubíll sendur af stað og eru slökkviliðsmenn nýkomnir á vettvang.
Ekki fengust frekari upplýsingar um málið að sinni.
Birta Þöll Sveinbjörnsdóttir vegfarandi náði meðfylgjandi myndskeiði af sinubrunanum.